काठमाडौँ । मोरङको सुन्दरहरैँचा नगरपालिकास्थित पञ्चायत माध्यमिक विद्यालयको नयाँ भवन भारत सरकारको सहयोगमा निर्माण भएको छ ।
नवनिर्मित विद्यालय भवनको कोशी प्रदेशका मुख्यमन्त्री हिक्मतकुमार कार्की, नेपालस्थित भारतीय दूतावासका प्रथम सचिव नारायण सिंह र सुन्दरहरैँचा नगरपालिकाका मेयर केदारप्रसाद गुरागाईंले संयुक्त रूपमा उद्घाटन गरेका छन् ।
भारतीय दूतावासका अनुसार विद्यालय भवन निर्माण कार्य ‘उच्च प्रभाव सामुदायिक विकास परियोजना’अन्तर्गत गरिएको हो । मुख्यमन्त्री कार्कीले भारत सरकारको सहयोगमा निर्माण भएको नयाँ पूर्वाधारले विद्यार्थी तथा शिक्षकको सिकाइ वातावरण थप सहज र प्रभावकारी बनाउन सहयोग पुग्ने विश्वास व्यक्त गरे ।
भारत सरकारको उच्च प्रभाव सामुदायिक विकास परियोजनाअन्तर्गत नेपालका सातवटै प्रदेश र ७४ जिल्लामा हालसम्म ६०५ वटा परियोजना सञ्चालनमा रहेको भारतीय दूतावासले जनाएको छ । कोशी प्रदेशमा मात्रै १०३ वटा परियोजना सञ्चालनमा छन् भने मोरङमा १७ वटा परियोजना कार्यान्वयनमा रहेका छन् ।
त्यस्तै, भारतले कोशी प्रदेशलाई १५० वटा एम्बुलेन्स र ६२ वटा स्कुल बस उपलब्ध गराएको छ । तीमध्ये मोरङ जिल्लामा मात्रै २१ वटा एम्बुलेन्स र १७ वटा स्कुल बस प्रदान गरिएको दूतावासले जनाएको छ ।
उच्च प्रभाव सामुदायिक विकास परियोजनामार्फत प्राथमिकताका क्षेत्रमा पूर्वाधार विकास गर्नुका साथै स्थानीयस्तरमा विकास र समृद्धिमा योगदान पुर्याउने भारत सरकारको लक्ष्य रहेको विज्ञप्तिमा उल्लेख छ ।
