२१ असोज, काठमाडौं । नेपाली कांग्रेसको १५औँ महाधिवेशनमा पदाधिकारीलगायत विभिन्न पदका उम्मेदवारविरुद्ध दाबी–विरोध सुरु भएको छ ।
निर्वाचन समितिले बुधबार बिहान प्रारम्भिक नामावली सार्वजनिक गरेपछि उम्मेदवारविरुद्ध दाबी–विरोध प्रक्रिया सुरु भएको हो । दाबी–विरोधका लागि मध्याह्न १२ बजेसम्मको समय तोकिएको छ ।
महाधिवेशनबाट सभापति १, वरिष्ठ उपसभापति १, उपसभापति ४, महामन्त्री ३, सहमहामन्त्री १५ र कोषाध्यक्ष १ गरी २४ जना पदाधिकारी रहने व्यवस्था छ । तीमध्ये सहमहामन्त्री ४ जना र कोषाध्यक्ष १ जना सभापतिले मनोनीत गर्ने व्यवस्था भएकाले १९ जना पदाधिकारी निर्वाचित हुनेछन् ।
निर्वाचन समितिले सार्वजनिक गरेको प्रारम्भिक सूचीअनुसार १९ पदाधिकारीका लागि ७९ जनाको उम्मेदवारी परेको छ । सभापति पदमा वर्तमान सभापति गगन थापा, पूर्वसहमहामन्त्री किशोरसिंह राठोर र श्यामकृष्ण खड्गीले उम्मेदवारी दिएका छन् ।
वरिष्ठ उपसभापति पदमा विश्वप्रकाश शर्माको एकल उम्मेदवारी परेको छ । त्यस्तै, समावेशी महिला क्लस्टरअन्तर्गत उपसभापति पदमा पुष्पा भुसालको पनि एकल उम्मेदवारी परेको छ । शर्मा र भुसाल दुवै हाल उपसभापति पदमा छन् ।
निर्वाचन समितिले तोकेको समयभित्र प्राप्त दाबी–विरोधमाथि छानबिन गरी उम्मेदवारको अन्तिम नामावली सार्वजनिक गर्नेछ ।
