धनुषा । धनुषाको मुखियापट्टी मुसहरनिया गाउँपालिका–३, तुल्सियाही जब्दीस्थित श्री राष्ट्रिय प्राथमिक विद्यालयमा शैक्षिक प्रदर्शनी तथा बालमैत्री कार्यक्रम आयोजना गरिएको छ। प्रदर्शनीमा विद्यार्थीहरूले कक्षाकोठामा सिकेका विषयवस्तुलाई विभिन्न शैक्षिक सामग्री, नमुना तथा प्रयोगात्मक प्रस्तुतिमार्फत प्रदर्शन गरेका थिए।
विद्यार्थीहरूले आफैंले तयार पारेका सामग्रीबारे शिक्षक, अभिभावक तथा कार्यक्रममा सहभागी अतिथिलाई जानकारी गराउँदै आफूले सिकेका विषयलाई आफ्नै शैलीमा व्याख्या गरेका थिए। यस क्रममा उनीहरूले सिकाइलाई व्यवहारसँग जोडेर प्रयोगात्मक रूपमा प्रस्तुत गर्ने अवसर पाए।
कार्यक्रममा प्रमुख अतिथिका रूपमा मुखियापट्टी मुसहरनिया गाउँपालिकाका अध्यक्ष जयकुमार यादव सहभागी भएका थिए। कार्यक्रममा बोल्दै अध्यक्ष यादवले गाउँपालिकाभित्रको शैक्षिक सेवा सुधारलाई प्राथमिकतामा राखेको बताए।
उनले छोरी तथा बुहारीलाई शिक्षित बनाउने अभियानलाई समेत अघि बढाउने प्रतिबद्धता व्यक्त गर्दै ‘छोरी बोझ होइन, अवसर हुन्’ भन्ने सोच विकास गर्नुपर्ने बताए। छोरीहरूलाई शिक्षित बनाउँदा परिवार तथा समाजमा हुने महिला हिंसा न्यूनीकरणसँगै हरेक क्षेत्रमा महिलाको सहभागिता र नेतृत्व बलियो बन्ने उनको धारणा थियो।
अध्यक्ष यादवले सरकारी सेवा प्रवाह तथा शिक्षा क्षेत्रको सुधारका लागि आवश्यक पहल गर्न आफू प्रतिबद्ध रहेको समेत बताए।
विद्यालयका अनुसार यस्ता गतिविधिले विद्यार्थीलाई पाठ्यपुस्तकमा पढेका विषयलाई व्यवहारसँग जोडेर बुझ्न सहयोग पुर्याउँछ। प्रदर्शनीका क्रममा विद्यार्थीले आफ्नो विचार राख्ने, प्रश्न गर्ने तथा आफूले सिकेको कुरा अरूलाई प्रस्तुत गर्ने अवसरसमेत पाएका थिए।
शिक्षाविद्हरूका अनुसार सिकेको विषयलाई प्रयोग गरेर देखाउने अवसर पाउँदा विद्यार्थीको सिकाइ थप प्रभावकारी बन्नुका साथै आत्मविश्वास, सिर्जनशीलता र प्रस्तुतीकरण क्षमताको विकासमा समेत सहयोग पुग्न सक्छ।
तुल्सियाही जब्दीमा आयोजित यो प्रदर्शनीले विद्यालय तहमा ‘पढेर मात्र होइन, गरेर सिक्ने’ अभ्यासलाई प्रोत्साहन गर्ने प्रयास गरेको छ। यस्ता कार्यक्रमलाई नियमित र प्रभावकारी रूपमा निरन्तरता दिन सके विद्यार्थीको व्यवहारिक सिकाइमा थप योगदान पुग्ने अपेक्षा गरिएको छ।
