२० असोज, काठमाडौं । नेकपा एमालेले २१ फागुनमा भएको निर्वाचनमा पार्टीले व्यहोरेको हारलाई अध्यक्ष केपी शर्मा ओलीको व्यक्तिगत असफलताका रूपमा लिन नहुने निष्कर्ष निकालेको छ।
तेस्रो केन्द्रीय कमिटी बैठकपछि जारी गरिएको २६ पृष्ठ लामो अन्तरपार्टी निर्देशन (अपानि) मा निर्वाचन परिणामलाई समग्र राजनीतिक, सामाजिक र संगठनात्मक परिस्थितिको परिणामका रूपमा विश्लेषण गरिएको छ।
अपानिमा पार्टीको हार बाह्य प्रहारका कारण मात्र नभई आन्तरिक कमजोरीको परिणामसमेत भएको उल्लेख गर्दै त्यसलाई अध्यक्ष ओलीको व्यक्तिगत असफलता मान्न नहुने बताइएको छ।
‘हार बाह्य प्रहारको मात्र परिणाम होइन, हार हाम्रो आन्तरिक कमजोरीको परिणाम पनि हो । तर हार अध्यक्षको व्यक्तिगत असफलता होइन,’ अपानिमा भनिएको छ, ‘यो सिंगो पार्टी संरचना, समयको मनोविज्ञान, बाह्य वातावरण, डिजिटल आक्रमण, चुनावी अवस्था र हाम्रा संगठनात्मक कमजोरीहरूको संयुक्त परिणाम हो।’
अध्यक्ष ओलीले भने निर्वाचनमा आफ्नो भागमा पर्ने जिम्मेवारी स्वीकार गर्ने बताएका छन्। तर हारका कारण आफूले नेतृत्वबाट पछि हट्नुपर्ने संकेत भने दिएका छैनन्।
‘अध्यक्षका रूपमा आफ्नो भागको जिम्मेवारी स्वीकार गर्छु। तर म यो पनि भन्छु– यो समय भाग्ने समय होइन, यो समय दोषारोपणमा अल्झिने समय पनि होइन,’ ओलीको भनाइ अपानिमा समेटिएको छ।
यससँगै अपानिले ओलीले तत्काल अध्यक्ष पद नछोड्ने सन्देशसमेत दिएको देखिएको छ। पार्टीले निर्वाचन हारको समीक्षा गर्दै संगठनात्मक कमजोरी सुधार गरेर अघि बढ्नुपर्नेमा जोड दिएको छ।
अपानिमा तेस्रो केन्द्रीय कमिटी बैठकबाट भएका मनोनयनलगायत विभिन्न निर्णय र अध्यक्ष ओलीका मन्तव्यसमेत समेटिएका छन्।
