काठमाडौं । राष्ट्रिय स्वतन्त्र पार्टी (रास्वपा)की सांसद इन्दिरा राना मगरले झापाका जनता जंगली हात्तीको त्रास र सुकुम्बासी समस्याबाट पीडित रहेको भन्दै सरकारको ध्यानाकर्षण गराएकी छन् ।
शुक्रबार प्रतिनिधिसभाको बैठकमा बोल्दै उनले बाली भित्र्याउने समयमा हात्तीले पुर्याएको क्षति नियन्त्रण गर्न तथा जग्गाको निस्सा पाइसकेका नागरिकलाई तत्काल लालपुर्जा उपलब्ध गराउन सरकारसँग माग गरिन् ।
दसैँ नजिकिँदै गर्दा झापाका किसान बाली जोगाउन रातभर जाग्राम बस्न बाध्य भएको उनले बताइन् । हात्तीको आतंकका कारण किसानको जनजीवन प्रभावित भएको भन्दै उनले पीडितलाई तत्काल राहत उपलब्ध गराउन सरकारसँग आग्रह गरिन् ।
सांसद राना मगरले हात्ती नियन्त्रणका लागि सरकारले गरिरहेका प्रयास प्रभावकारी हुन नसकेको टिप्पणी गरिन् । उनले सरकारी प्रयास ‘हात्ती आयो, हात्ती आयो फुस्स’ जस्तै बनेको बताउँदै दीर्घकालीन समाधान खोज्नुपर्नेमा जोड दिइन् ।
उनले झापामा जग्गासम्बन्धी समस्या पनि जटिल रहेको बताइन् । जग्गाको निस्सा पाइसकेका सुकुम्बासी नागरिकलाई पुनः नापीका नाममा दुःख दिने काम भइरहेको भन्दै उनले असन्तुष्टि जनाइन् ।
केही स्थानीय तहले ‘माथिबाट आदेश आएको’ भन्दै भ्रम फैलाउने गरेको जनगुनासो आएको उल्लेख गर्दै उनले सम्बन्धित मन्त्रालयले यस विषयमा स्पष्ट धारणा सार्वजनिक गर्नुपर्ने बताइन् ।
‘किसानहरू अहिले बाली जोगाउन रातभर निद्रा त्यागेर हात्ती रुङ्न बाध्य छन्, तर सरकारबाट ठोस राहतको प्रत्याभूति हुन सकेको छैन,’ उनले भनिन्, ‘निस्सा पाइसकेका सुकुम्बासीले अब छिटो लालपुर्जा पाउनुपर्छ । प्रक्रियामाथि प्रक्रिया थपेर उनीहरूलाई थप कष्ट दिनु हुँदैन।’
हात्तीबाट पीडित किसानलाई उचित राहत र लालपुर्जाको पर्खाइमा रहेका नागरिकलाई तत्काल स्वामित्वको प्रमाणपत्र उपलब्ध गराउन सरकारले स्पष्ट कार्ययोजना ल्याउनुपर्ने माग उनले गरिन् ।
