काठमाडौं । हरितालिका तिजका अवसरमा बिहानैदेखि पशुपतिनाथ मन्दिर परिसरमा दर्शनार्थी महिलाहरूको बाक्लो घुइँचो लागेको छ।
तिजको व्रत बसेका तथा पूजाआजाका लागि आएका महिलाहरू रातो सारी, हरियो चुरा, पोते र मेहन्दीमा सजिएर पशुपति पुगेका छन्। विशेषगरी चुल्ठोमा सिउरिएका रंगीचंगी फूलले पशुपति क्षेत्रको तिजको सांस्कृतिक रौनक थप आकर्षक बनाएको छ।
पारम्परिक पहिरनमा सजिएका महिलाहरू पूजाआजा, दर्शन र धार्मिक विधिमा सहभागी भइरहेका छन्। उनीहरूको बाक्लो उपस्थितिले पशुपति क्षेत्र तिजमय बनेको छ।
चुल्ठोमा फूल : परम्परा र सौन्दर्यको प्रतीक
तिजका अवसरमा महिलाहरूले चुल्ठोमा विभिन्न प्रकारका प्राकृतिक तथा कृत्रिम फूल सिउरिने चलन छ। यो नेपाली समाजमा पुस्तौँदेखि चलिआएको सांस्कृतिक परम्परासँग जोडिएको छ।
फूललाई नेपाली संस्कृतिमा सौन्दर्य, पवित्रता, प्रकृति र उत्सवको प्रतीकका रूपमा लिइन्छ। तिजमा विशेषगरी रातो, पहेँलो, सेतो तथा अन्य रंगका फूल चुल्ठोमा सजाउने गरिन्छ। यसले महिलाहरूको पारम्परिक पहिरनलाई थप आकर्षक बनाउनुका साथै चाडपर्वको उत्सवी वातावरण झल्काउँछ।
पशुपतिनाथमा दर्शन गर्न आउने महिलाहरूका लागि तिज धार्मिक आस्थासँगै माइती, साथीभाइ तथा आफन्तसँग भेटघाट गर्ने र सांस्कृतिक परम्परा मनाउने अवसर पनि हो। यही कारण तिजका दिन पशुपति परिसरमा धार्मिक गतिविधिसँगै नेपाली मौलिक पहिरन, गहना र श्रृंगारको विविध दृश्यसमेत देख्न पाइन्छ।
हरितालिका तिजलाई हिन्दु महिलाहरूले भगवान् शिवको आराधना गर्दै मनाउने प्रमुख पर्वका रूपमा लिन्छन्। यस अवसरमा महिलाहरूले व्रत, पूजाआजा, भजन–कीर्तन तथा नाचगानमार्फत पर्व मनाउने परम्परा रहिआएको छ।
