काठमाडौँ । रसुवाको भोटेकोसी नदीमा बाढी आएको नौ दिनमा पनि जलविद्युत् आयोजनाका टनेल (सुरुङ) भित्रको खोज तथा उद्धार कार्य भइरहेको छ ।
नेपाली सेनाका अनुसार, हाल चारवटा विद्युत् आयोजनाका टनेलभित्र उद्धार कार्य चलिरहेको छ ।
लाङटाङ हाइड्रोमा विदेशीसहित २५ जनाको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरी दुई स्थानमा सानो–सानो होल बनाई खोजी कार्य गरिरहेको नेपाली सेनाले जनाएको छ ।
चिलिमे हाइड्रोमा विदेशीसहितको संयुक्त टोलीले खोज तथा उद्धारको कार्य गरिरहेको छ ।
त्रिशूली–३ए मा ९३ जनाको संयुक्त उद्धार टोलीले पाँचवटा स्काभेटरको प्रयोग गरी रातभर टनेलको आउटलेटमा भरिएको लेदो र माटो हटाउने क्रममा रातको करिब २ बजे आउटलेटको होललाई ठूलो बनाउन क्राउनलाई ब्लाष्टिङ गरी सफा गर्ने कार्य भइरहेको छ ।
यस्तै, त्रिशूली–३बी मा नेपाली सेनाको ८९, गैरसैनिक तीन र आयोजनाका प्रबन्ध निर्देशकसहितको संयुक्त उद्धार टोलीले आयोजनाको कार्यालय र निवास पहिचान गरी उक्त इलाकासम्म पुग्न एक्साभेटरबाट बाटो बनाउन बबक्याटको प्रयोग गरी खन्ने तथा माटो पन्छाउने कार्य भइरहेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, अहिले विभिन्न जलविद्युत् आयोजनामा कार्यरत ९०० जना सम्पर्कविहीन छन् ।
