काठमाडौँ । बाढी पीडितहरूको मनमा मलम लगाउन भारतीय अभिनेता सोनु सूद नेपाल आइपुगेका छन्। नेपालमा आएको विनाशकारी बाढीबाट प्रभावित नागरिकका लागि राहत सामग्री लिएर उनी मंगलबार काठमाडौँ आइपुगेका हुन्।
नेपाल आउने बित्तिकै उनी बाढी प्रभावितलाई भेट्न काठमाडौँमा रहेको पहेँलो गुम्बामा गएका थिए । त्यहाँ बाढी प्रभावित बालबालिका भेटेपछि उनले सामाजिक सञ्जालमा लेखेका छन्, उनीहरूले आफ्ना घर, परिवार र बाल्यकाल गुमाए—तर हामी मिलेर उनीहरूलाई नयाँ सुरुवात गर्न मद्दत गर्नेछौँ। नेपाल, तिमी एक्लो छैनौ।
आज भने बिहानैदेखि सोनु सूद बाढी प्रभावित क्षेत्र अवलोकनका लागि निस्किएका छन् । बाढी प्रभावित बस्तीमा पुगेर उनले नागरिकहरूलाई एक्लो हुनुहुन्न भन्दै सान्त्वना दिइरहेका छन् ।
नेपालमा बाढीबाट ठूलो जनधनको क्षति भएको समाचार सार्वजनिक भए लगत्तै अभिनेता सूदले दुःख व्यक्त गरेका थिए।
उनले सामाजिक सञ्जालमा लेखेका थिए,’नेपाल, तिमी एक्लो छैनौ। हामी खाना, आश्रय र पुनर्निर्माणमा सहयोग गर्ने शक्ति लिएर आउँदैछौं।’
