काठमाडौं । राष्ट्रिय स्वतन्त्र पार्टी (रास्वपा)ले केन्द्रीय सदस्य विजय जैरुलाई सार्वजनिक सेवा तथा गुनासो व्यवस्थापन विभाग प्रमुखको जिम्मेवारी दिएको छ।
रास्वपाको संगठन विस्तार र जनतासँगको सम्बन्धलाई थप प्रभावकारी बनाउने उद्देश्यसहित जैरुलाई उक्त विभागको नेतृत्व दिइएको हो। सार्वजनिक सेवा प्रवाहसँग सम्बन्धित समस्या, नागरिकका गुनासा तथा सुझावलाई पार्टीको तहबाट सम्बोधन गर्न विभागले भूमिका खेल्ने अपेक्षा गरिएको छ।
जैरु रास्वपाको स्थापनाकालदेखि नै पार्टीको संगठन विस्तार तथा प्रचार–प्रसारमा सक्रिय रहँदै आएका नेता हुन्। विशेषगरी सुदूरपश्चिममा रास्वपालाई चिनाउन तथा पार्टीको संगठन निर्माणमा उनले महत्वपूर्ण भूमिका निर्वाह गरेको रास्वपा वृत्तमा चर्चा हुने गरेको छ।
२०७९ सालको प्रतिनिधिसभा निर्वाचनमा समेत जैरु रास्वपाका तर्फबाट उम्मेदवार बनेका थिए। निर्वाचनपछि पार्टीले उनलाई केन्द्रीय सदस्यमा मनोनयन गरेको थियो।
त्यसयता पनि उनी पार्टीका विभिन्न गतिविधिमा सक्रिय रहँदै आएका छन्। रास्वपाको हालै सम्पन्न पहिलो महाधिवेशनबाट उनी दलित समूहअन्तर्गत केन्द्रीय सदस्यमा निर्वाचित भएका हुन्। महाधिवेशनको निर्वाचनमा जैरुले १ हजार ३३९ मत प्राप्त गरेको विवरण सार्वजनिक भएको छ।
रास्वपाको आधिकारिक वेबसाइटमा पनि जैरुलाई केन्द्रीय सदस्यका रूपमा उल्लेख गरिएको छ।
नयाँ जिम्मेवारीसँगै जैरुको मुख्य प्राथमिकता नागरिकका गुनासा संकलन गर्ने, सार्वजनिक सेवासँग जोडिएका समस्या पहिचान गर्ने र ती विषयलाई सम्बन्धित निकाय तथा पार्टी नेतृत्वसमक्ष प्रभावकारी रूपमा पुर्याउने रहने बताइएको छ।
रास्वपाले नागरिकका समस्या र गुनासालाई संगठनको प्राथमिकतामा राख्दै आएको सन्दर्भमा जैरुलाई दिइएको यो जिम्मेवारीलाई पार्टीभित्र महत्वपूर्ण जिम्मेवारीका रूपमा हेरिएको छ।
