काठमाडौँ । नेपाली कांग्रेसको १५ औं महाधिवेशन पूर्वनिर्धारित कार्यतालिकाअनुसार नै हुने भएको छ।
९ दिनसम्म केन्द्रीय कार्यालय सानेपामा चलेको कांग्रेसको केन्द्रीय कार्यसमिति बैठकले १५ औं महाधिवेशन पूर्वनिर्धारित कार्यतालिकाअनुसार असोज १६ देखि १९ गतेसम्म नै गर्ने निष्कर्ष निकालेको हो।
केन्द्रीय समिति बैठकमा सम्बोधन गर्दै सभापति गगन थापाले पूर्वनिर्धारित कार्यतालिकाअनुसार नै महाधिवेशन गरिने बताए। थापाले मंगलबारदेखि नै अधिवेशनका प्रक्रिया सुरू हुने जानकारी दिए।
प्रेमबहादुर खड्का संयोजक रहेको केन्द्रीय निर्वाचन समितिले सभापति थापाको उपस्थितिमा आज दिउँसो २ बजे सानेपामा निर्वाचन अधिकृतहरूलाई प्रशिक्षण दिने भएको छ।
असोज १६ देखि १९ गतेसम्म हुन गइरहेको १५ औं केन्द्रीय महाधिवेशनअन्तर्गत विभिन्न जिल्लाहरुमा निर्वाचन सम्पन्न गर्न तोकिएका निर्वाचन अधिकृतहरूलाई प्रशिक्षण दिन लागिएको हो। कांग्रेसले कानुनी पृष्ठभूमि रहेकाहरूलाई निर्वाचन अधिकृत बनाएको छ।
