रुपन्देही । भूमि व्यवस्था, सहकारी तथा गरिबी निवारण मन्त्री प्रतिभा रावलको सक्रिय पहलमा रुपन्देहीको रोहिणी गाउँपालिकाका स्थानीयले ५८ वर्षदेखि समाधान हुन नसकेको जग्गा स्वामित्वको समस्याबाट मुक्ति पाएका छन्। साविक बोधवार र पर्सा गाउँ विकास समिति क्षेत्रमा वर्षौँदेखि रोकिएको लालपुर्जा वितरण प्रक्रिया अघि बढाउँदै सरकारले २७१ परिवारलाई जग्गाधनी दर्ता प्रमाणपुर्जा (लालपुर्जा) वितरण गरेको हो।
२०२५ सालमा गाउँब्लकका रूपमा एकसरो नापी सम्पन्न भए पनि विभिन्न प्रशासनिक र कानुनी जटिलताका कारण स्थानीयले करिब पाँच दशकभन्दा बढी समयसम्म आफ्नै जग्गाको कानुनी स्वामित्वको प्रमाण पाउन सकेका थिए। अहिले मन्त्री रावलले मन्त्रालय सम्हालेपछि रोकिएका यस्ता फाइललाई प्राथमिकतामा राख्दै प्रक्रिया अघि बढाएकी छन्।
भूमि व्यवस्थापन तथा अभिलेख विभागका अनुसार उक्त क्षेत्रमा कुल ३२४ वटा दर्ता कायम भएकोमा पहिलो चरणमा २७१ वटा लालपुर्जा सम्बन्धित जग्गाधनीलाई हस्तान्तरण गरिएको छ। बाँकी दर्ताको काम पनि आवश्यक प्रक्रिया पूरा गरी छिट्टै सम्पन्न गरिने मन्त्रालयले जनाएको छ।
लालपुर्जा प्राप्त भएसँगै स्थानीयले अब आफ्नो जग्गाको कानुनी स्वामित्व सुनिश्चित गरेका छन्। यसले जग्गा किनबेच, बैंकबाट ऋण लिन, धितो राख्न, उत्तराधिकार कायम गर्न, घर निर्माण अनुमति लिन तथा अन्य सरकारी सेवा प्राप्त गर्न सहज हुने विश्वास गरिएको छ।
मन्त्री प्रतिभा रावलले लामो समयदेखि अलपत्र परेका भूमि सम्बन्धी समस्या समाधान गर्नु मन्त्रालयको प्राथमिकता रहेको बताउँदै वर्षौँदेखि लालपुर्जा नपाएका नागरिकलाई कानुनी स्वामित्व दिलाउने अभियानलाई देशभर तीव्र बनाइने प्रतिबद्धता जनाएकी छन्। उनका अनुसार नागरिकलाई जग्गाको स्वामित्व सुनिश्चित गराउनु सरकारको जिम्मेवारी भएकाले रोकिएका गाउँब्लक, अव्यवस्थित बसोबासी तथा अन्य भूमि सम्बन्धी समस्या चरणबद्ध रूपमा समाधान गरिनेछ।
पछिल्ला महिनाहरूमा मन्त्रालयले झापाको अर्जुनधारा नगरपालिकासहित विभिन्न स्थानमा पनि वर्षौँदेखि रोकिएका लालपुर्जा वितरणलाई अघि बढाएको छ। रुपन्देहीमा ५८ वर्षपछि भएको यो वितरणलाई भूमि व्यवस्थापन क्षेत्रमा सरकारको महत्वपूर्ण उपलब्धिका रूपमा हेरिएको छ।
स्थानीयवासीले पनि दशकौँको प्रतीक्षापछि आफ्नो नाममा लालपुर्जा प्राप्त गर्न पाएकोमा खुसी व्यक्त गर्दै अब आफ्नो सम्पत्तिमाथिको अधिकार कानुनी रूपमा सुरक्षित भएको बताएका छन्।
