काठमाडौं । नेपाली कांग्रेसले सुनसरीको कप्तानगञ्ज घटनामा सरकारको गैरजिम्मेवारीपन, असंवेदनशीलता तथा नागरिकमाथि अत्यधिक बल प्रयोग भएको भन्दै गम्भीर आपत्ति जनाएको छ।
पार्टीको केन्द्रीय बैठकले घटनाको सत्यतथ्य पत्ता लगाउन उच्चस्तरीय न्यायिक छानबिन समिति गठन गर्न सरकारसँग माग गरेको छ। साथै, घाइतेहरूको निःशुल्क उपचार, पीडित परिवारलाई उचित राहत तथा तोडफोड र आगजनीबाट भएको क्षतिको क्षतिपूर्ति उपलब्ध गराउन पनि आग्रह गरेको छ।
कांग्रेसले सामाजिक सद्भाव, धार्मिक सहिष्णुता र राष्ट्रिय एकतालाई पहिलो प्राथमिकतामा राख्दै मधेश प्रदेश सरकार, स्थानीय तह र पार्टीका सबै संरचनालाई शान्ति कायम गर्न सक्रिय भूमिका खेल्न निर्देशन दिएको छ।
साथै, पार्टीका नेता–कार्यकर्तालाई अफवाह, उत्तेजना र हिंसात्मक गतिविधिबाट टाढा रहन तथा सामाजिक सद्भाव खलबल्याउने कुनै पनि गतिविधिमा संलग्न भए विधानअनुसार कारबाही गरिने चेतावनीसमेत दिएको छ।
