काठमाडौं। सुनसरीबाट सुरु भएर तराईका विभिन्न क्षेत्रमा फैलिएको साम्प्रदायिक तनावका बीच पूर्वराजा ज्ञानेन्द्र वीरविक्रम शाहले देशवासीका नाममा विशेष सन्देश जारी गर्दै सामाजिक सद्भाव र राष्ट्रिय एकता जोगाउन आग्रह गरेका छन्।
निर्मल निवासस्थित संवाद सचिवालयमार्फत साउन १४ गते जारी सन्देशमा पूर्वराजा शाहले सुनसरी घटनाबाट जनधनको क्षति हुनुका साथै त्यसको प्रभाव कोशी क्षेत्र र तराईका अन्य जिल्लासम्म फैलिएकोप्रति गहिरो दुःख र चिन्ता व्यक्त गरेका छन्।
उनले नेपाललाई बहुजातीय, बहुभाषिक र बहुधार्मिक सहअस्तित्वको उदाहरणका रूपमा उल्लेख गर्दै यस्ता अवाञ्छित घटनाले नेपालको मौलिक पहिचान र सामाजिक सद्भावमा आघात पुग्ने बताएका छन्।
सन्देशमा उनले नेपालीहरू आदिकालदेखि नै आपसी प्रेम, सद्भाव र सहकार्यका साथ बाँच्दै आएको उल्लेख गर्दै कुनै पनि व्यक्ति वा समूहबाट त्यसमा खलल पुग्न नहुनेमा जोड दिएका छन्।
पूर्वराजा शाहले नेपालको धार्मिक, सांस्कृतिक र सामाजिक विविधताले नै विश्वमा देशको सम्मान बढाएको उल्लेख गर्दै सबै नेपालीलाई संयम अपनाउन, अफवाहबाट टाढा रहन र राष्ट्रिय एकता तथा सामाजिक सद्भावलाई सबैभन्दा माथि राख्न आग्रह गरेका छन्।
उनले अन्त्यमा भनेका छन्, “जुनसुकै भू–भागमा रहे पनि हामी सबै नेपाली मिलेर बसौँ, यही आजको आवश्यकता हो।”
