चीनको बेइजिङमा श्वेत चैत्य सांस्कृतिक सप्ताह सुरु भएको छ। महान् नेपाली वास्तुकार अरनिको ले निर्माण गरेको श्वेत चैत्यको ७५०औँ वार्षिकोत्सवका अवसरमा आयोजित सप्ताहमा अरनिकोका नयाँ कला सिर्जनासम्बन्धी सामग्री र एक हजार वर्ष पुराना नेपाली शैलीका मूर्तिहरू प्रदर्शनमा राखिएका छन्।
जुन १९ सम्म चल्ने कार्यक्रममा अरनिको र नेपाली बौद्ध कला, युआन राजवंशको कला तथा नेपाल–चीन सांस्कृतिक सम्बन्धबारे विशेष छलफलसमेत आयोजना गरिएको छ। प्रदर्शनीमा चीनका विभिन्न क्षेत्रमा रहेका अरनिकोसँग सम्बन्धित केही कम चर्चित सम्पदा र मूर्तिकलाका प्रमाणहरू पनि प्रस्तुत गरिएको छ।
आयोजकका अनुसार हालसम्म खासै चर्चामा नआएका केही मन्दिर, स्तुप र शिलालेखमार्फत अरनिको केवल वास्तुकार र कलाकार मात्र नभई धार्मिक तथा सांस्कृतिक परियोजनाका प्रमुख संयोजकसमेत रहेको तथ्य उजागर भएको छ।
सन् १२४४ मा पाटनमा जन्मिएका अरनिकोले चीनमा श्वेत चैत्यसहित थुप्रै मन्दिर, चैत्य र कलाकृति निर्माण गरेका थिए। उनका सिर्जनाहरूको खोज तथा अध्ययन अझै जारी रहेको र नयाँ प्रमाणहरू फेला पर्ने क्रम जारी रहेको आयोजकले जनाएको छ।
