सत्तारुढ राष्ट्रिय स्वतन्त्र पार्टी (रास्वपा) भित्र बढ्दो आन्तरिक विवादले प्रदेश अधिवेशन प्रभावित भएको छ। पार्टीले महाधिवेशनको तयारी गरिरहेकै बेला केही प्रदेशमा अधिवेशन स्थगित हुँदा तय गरिएको कार्यतालिका प्रभावित हुने चिन्ता बढेको हो।
केन्द्रीय समितिले जेठ अन्तिम सातादेखि असार पहिलो सातासम्म जिल्ला र प्रदेश अधिवेशन सम्पन्न गर्ने निर्णय गरेको थियो। अधिकांश जिल्ला र पालिकामा अधिवेशन सम्पन्न भए पनि बागमती र मधेस प्रदेशमा विवादका कारण प्रक्रिया रोकिएको छ। संगठन विभागका पदाधिकारीले भने असार पहिलो साताभित्र सबै प्रदेशको अधिवेशन टुंग्याएर महाधिवेशनको मिति नबदलिने दाबी गरेका छन्।
बागमती प्रदेशमा नेतृत्व प्रतिस्पर्धा चर्किएपछि निर्वाचन प्रक्रिया रोकिएको हो। पार्टीका अनुसार मतपत्र छपाइ, मतदाता नामावली र व्यवस्थापनसम्बन्धी प्राविधिक त्रुटिका कारण अधिवेशन अस्थायी रूपमा स्थगित गरिएको हो। समस्या समाधानपछि प्रतिनिधिलाई पुनः बोलाएर निर्वाचन गरिने तयारी छ।
मधेस प्रदेशमा भने विवाद अझ गहिरो बनेको छ। गुटगत स्वार्थ, नेतृत्व हस्तक्षेप र जातीय समीकरणका कारण अधिवेशन अनिश्चितकालका लागि रोकिएको आरोप नेताहरूबीच नै चलिरहेको छ। केही जिल्ला नेताले केन्द्रीय नेतृत्व तथा प्रभावशाली सांसदहरूमाथि संगठन कमजोर बनाएको आरोप लगाएका छन्।
उता कोशी प्रदेशमा नेतृत्व प्रतिस्पर्धापछि असन्तुष्ट नेताले पार्टी नै छोड्ने घोषणा गरेकी छन्। यसले पार्टीभित्र गुट–उपगुट बढ्दो अवस्थामा रहेको संकेत गरेको छ।
रास्वपाका शीर्ष नेताहरूले पार्टी विस्तारसँगै देखिएको आन्तरिक असन्तुष्टिलाई सुधारको अवसरका रूपमा लिनुपर्ने बताएका छन्। पार्टी सभापति रवि लामिछानेले पनि व्यक्तिगत स्वार्थभन्दा सामूहिक नेतृत्व र संगठन सुदृढीकरणमा केन्द्रित हुनुपर्ने सन्देश दिएका छन्। तर बढ्दो विवादले रास्वपाको आन्तरिक एकता र आगामी महाधिवेशनको तयारीमाथि प्रश्न खडा गरेको छ।
