काठमाण्डौ। राष्ट्रिय स्वतन्त्र पार्टी (रास्वपा) को मधेश प्रदेशका जिल्ला अधिवेशनहरू विवाद, प्रक्रियागत असहमति र संगठनात्मक कमजोरीका कारण प्रभावित भएका छन् । प्रदेशका आठवटै जिल्लामा अधिवेशनको प्रक्रिया प्रभावित भएको छ भने आठवटै जिल्लामा नेतृत्व चयन कार्य टुंगिन सकेको छैन । महोत्तरी जिल्लाको शनिबार जलेश्वरमा सुरु भएको जिल्ला अधिवेशन दुई पक्षबीचको विवादका कारण अनिश्चितकालका लागि स्थगित गरिएको छ । अधिवेशनको दोस्रो दिन बन्दसत्रमा समेत सहमति जुट्न नसकेपछि निर्वाचन संयोजक मनिषकुमार साहले अर्को सूचना नभएसम्म अधिवेशन स्थगित गरिएको जानकारी दिएका छन् । प्रतिनिधिहरूसँगको छलफल तथा शान्ति सुरक्षाको अवस्थालाई ध्यानमा राख्दै अधिवेशन रोकिएको जनाइएको छ ।
धनुषामा पनि पार्टीभित्रको विवाद चर्किएको छ । जिल्ला अध्यक्ष लक्ष्मेश्वर यादवमाथि मनोमानी गरेको आरोप लगाउँदै एक समूहले पार्टी कार्यालयमा तालाबन्दी गरेको छ । यसअघि पालिका अधिवेशनका क्रममा कुटाकुटसमेत भएको थियो । जिल्लास्तरीय अधिवेशनबारे भने औपचारिक निर्णय सार्वजनिक भएको छैन । सर्लाहीमा मतदाता नामावली, पालिका अधिवेशनसम्बन्धी कागजात तथा निर्वाचित प्रतिनिधिहरूको विवरण अद्यावधिक नभएकाले जिल्ला अधिवेशन स्थगित गरिएको छ । जिल्ला निर्वाचन संयोजक डा. जयप्रकाश महतोका अनुसार डिजिटल पोर्टलमा आवश्यक विवरण प्रविष्ट गर्ने क्रममा प्रक्रियागत समस्या देखिएपछि निर्वाचन प्रक्रिया रोकिएको हो ।
रौतहट, बारा र पर्सामा पनि विभिन्न विवादका कारण अधिवेशन प्रक्रिया प्रभावित भएको छ । सिरहामा २४ जेठमा सहमतिबाट नेतृत्व चयन हुन नसकेपछि निर्वाचनमार्फत नयाँ जिल्ला कार्यसमिति चयन गर्ने तयारी गरिएको थियो । तर अन्तिम समयमा त्यहाँ पनि विवाद उत्पन्न भएपछि प्रक्रिया स्थगित भएको छ । मधेश प्रदेशमा जेठ २८ गते प्रदेश अधिवेशन तय गरिएकाले त्यसअघि जिल्लास्तरीय अधिवेशन सम्पन्न गर्न पार्टी नेतृत्वमाथि दबाब बढेको छ । तर विवाद, असन्तुष्टि र व्यवस्थापकीय कमजोरीका कारण अधिकांश जिल्लामा प्रक्रिया अल्झिएको देखिएको छ ।
रास्वपाको मधेश संगठन विभागका उपप्रमुख अम्बुप्रसाद साहका अनुसार जेठ २६ भित्र सम्पन्न हुनुपर्ने जिल्ला अधिवेशनहरू विभिन्न कारणले हालसम्म टुंगिन सकेका छैनन् । उनले मधेश प्रदेशका १३६ पालिकामध्ये हालसम्म करिब १२० पालिकामा मात्र अधिवेशन सम्पन्न भएको जानकारी दिए । मधेश प्रदेशमा संगठन विस्तारसँगै नेतृत्व चयन प्रक्रियामा देखिएका विवाद र असन्तुष्टिले पार्टीभित्रको आन्तरिक व्यवस्थापन तथा संगठनात्मक चुनौतीलाई उजागर गरेको छ ।
