मधेश प्रदेशअन्तर्गत धनुषा जिल्लाको सबैला नगरपालिकामा न्युज एक्सप्रेस मिडियाद्वारा सञ्चालित ‘संवाद एक्सप्रेस’ कार्यक्रम सम्पन्न भएको छ। देशभरका ७५३ स्थानीय तहलाई लक्षित गर्दै सञ्चालन भइरहेको उक्त कार्यक्रम मिति २०८३ जेठ १० गते सबैलामा आयोजना गरिएको हो।
कार्यक्रममा नगरप्रमुख कारी राम यादव, प्रमुख प्रशासकीय अधिकृत खिम बहादुर भुजेल तथा नगरपालिकाका १३ वटै वडाका अध्यक्षहरूको प्रत्यक्ष सहभागिता रहेको थियो। साथै स्थानीय राजनीतिक दलका प्रतिनिधि, सरोकारवाला निकाय, बुद्धिजीवी वर्ग तथा नगरवासीको उल्लेख्य उपस्थिति रहेको थियो।
झण्डै डेढ घण्टा सञ्चालन भएको कार्यक्रममा नगरको विकास निर्माण, शिक्षा, स्वास्थ्य, सेवा प्रवाह तथा स्थानीय जनचासोका विषयमा केन्द्रित रहेर खुला बहस गरिएको थियो। कार्यक्रममा बोल्दै नगरप्रमुख यादवले आफ्नो कार्यकालमा सम्पन्न भएका सकारात्मक तथा उपलब्धिमूलक कामबारे जानकारी गराएका थिए। साथै, विभिन्न कारणले अपेक्षाअनुसार पूरा गर्न नसकिएका योजना तथा चुनौतीका विषयमा समेत खुलेर धारणा राखेका थिए।
त्यसैगरी, १३ वटै वडा अध्यक्षहरूले आफ्नो कार्यकालमा भएका विकास निर्माणका काम, वडास्तरका उपलब्धि तथा आगामी योजनाबारे चर्चा गरेका थिए। कार्यक्रममा नगरभित्र विकास निर्माणमा देखिएको ढिलासुस्ती, सडक निर्माणमा भएको लापरबाही तथा नगरपालिकाको प्रशासनिक भवन निर्माणसँग सम्बन्धित समस्याबारे पनि गम्भीर छलफल भएको थियो।
प्रमुख प्रशासकीय अधिकृत खिम बहादुर भुजेलले नगरको समग्र विकासका लागि जनप्रतिनिधि र प्रशासनबीच समन्वय आवश्यक रहेको उल्लेख गर्दै जनप्रतिनिधिहरूको सहयोग पाए कर्मचारी संयन्त्रलाई थप प्रभावकारी ढंगले परिचालन गरी सेवा प्रवाहलाई चुस्त बनाउने प्रतिबद्धता व्यक्त गरे।
कार्यक्रमको सञ्चालन उमेश सुनारले गरेका थिए भने कार्यक्रमको उत्पादन (प्रोडक्सन) प्रतिक श्रेष्ठले गरेका थिए।
संविधान २०७२ अनुसार स्थानीय तह पुनःसंरचनाको क्रममा २०७३ फागुन २७ गते साविकका पटेर्वा, सबैला, मनहर्वा, ठिल्ला, यदुवा, सतोषर, खरिहानी, कजरा रमौल र रघुनाथपुर गाविस समायोजन गरी सबैला नगरपालिका गठन गरिएको हो। १३ वडा रहेको नगरपालिकाको क्षेत्रफल ६४.४७ वर्ग किलोमिटर रहेको छ भने यसको कार्यालय धनुषा सदरमुकामबाट करिब १७.८ किलोमिटर दूरीमा अवस्थित छ।
कार्यक्रमले स्थानीय सरकार र नागरिकबीच प्रत्यक्ष संवादको वातावरण सिर्जना गर्नुका साथै नगरका समस्या, विकासका सम्भावना तथा सेवा प्रवाह सुधारका उपायबारे सार्थक बहस भएको सहभागीहरूले बताएका छन्।
