काठमाडौं । नेपाली कांग्रेसका नेता प्रकाश शरण महतलले लोकतान्त्रिक मूल्य र मान्यतालाई स्थापना गर्न संघर्षरत कांग्रेस अहिले अप्ठ्यारो अवस्थामा रहेको बताएका छन् ।
बुधबार काठमाडौंमा आयोजित नेपाली कांग्रेस बागमती प्रदेशस्तरीय भेलालाई सम्बोधन गर्दै उनले भदौ २३ र २४ को घटनापछि नेपालमा श्रृंखलाबद्ध राजनीतिक गतिविधि भएको उल्लेख गरे । उनले नेपाली कांग्रेस नेपालको सर्वाधिक लोकप्रिय पार्टी, संविधान निर्माणमा अगुवाइ गर्ने शक्ति तथा लोकतान्त्रिक मूल्य र मान्यताको आधार भएको भए पनि अहिले चुनौतीपूर्ण अवस्थामा पुगेको बताए ।
उनले भने, ‘भदौ २३ र २४ को घटनापछि नेपालमा श्रृंखलाबद्ध क्रियाकलापहरु भए । आज नेपाली कांग्रेस पार्टी नेपालको सर्वाधिक लोकप्रिय र सत्ताको अगुवाइ गरिरहेको पार्टी, संविधान निर्माणमा अगुवाइ गरिरहेको पार्टी लोकतान्त्रिक मूल्य र मान्यतालाई स्थापना गर्नका लागि सबैले आशा र भरोसाको नजरले हेर्ने पार्टी बडो अप्ठ्यारो अवस्थामा छ । अहिले स्थापना भएको सरकारमै प्रश्न चिन्ह उठ्ने प्रवृत्ति विकसित भएको छ । यस्तो बेला नेपाली कांग्रेसको भूमिका कस्तो हुने र कसरी चल्नुपर्ने भन्ने कुरा अत्यन्त टड्कारो रुपमा पार्टीपंक्तिको बीचमा खड्किएको हामीले महसुस गरेका छौं ।’
महतले कांग्रेसको पुरानो सहमतिमूलक राजनीतिक संस्कार कमजोर हुँदा पार्टीमा समस्या आएको पनि बताए ।
उनले विपी कोइराला, गणेशमान सिंह जस्ता नेताहरुको समयमा सहमतिका आधारमा पार्टी सञ्चालन हुने परम्परा रहेको स्मरण गरे ।
‘नेपाली कांग्रेसको परम्परागत संस्कार छ, विपी कोइराला, गणेशमान सिंह, सुर्वण शमशेर राणाले स्थापना गरेको पाटी । यो पाटीमा विपी कोइराला नेतृत्वमा हुँदापनि गणेशमान सिंहको सल्लाह लिइन्थ्यो, अरु नेताहरुको समेत सल्लाह लिएर सहमतीबाट अगाडि बढाउने परम्परा त्योवेलादेखी निरन्तर अगाडि बढेको थियो, जुनवेला त्यसमा क्रमभङग भयो अनि पाटीमा समस्या आयो,’ उनले भने ।
महतले विशेष महाधिवेशनबाट आएको नेतृत्वले सबैको सहभागिता र बहुसंख्यक महासमिति सदस्यको समर्थनबिना गरेको एकलौटी निर्णयले पार्टीलाई एकताबद्ध बनाउन नसक्ने टिप्पणी गरे । उनले अहिले राजनीतिक चुनौती सामना गर्न पार्टीलाई एकताबद्ध बनाएर अघि बढ्न आवश्यक रहेको बताए ।
‘विशेष अधिवेशन सबैको सहभागिता नभइकन बहुसंख्यक महासमितिको सहभागिताविना नै सम्पन्न भएको हुँनाले विशेष अधिवेशनबाट आएको नेतृत्वले गरेको एकलौटी निर्णयले पाटीलाई एकतावद्ध बनाएर लान सक्दैन । राजनीतिकरुपमा पाटीलाई एकतावद्धरुपमा लिएर जानु आजको आवश्यकता छ, चूनौति छन् त्यसलाई सामना गर्नुपर्ने आवश्यकता छ,’ उनले भने ।
