काठमाडौँ । तनहुँ क्षेत्र नम्बर १ प्रतिनिधिसभा सदस्यको उपनिर्वाचन अन्तर्गत मतदान जारी रहेको छ । निर्वाचनमा डा. स्वर्णिम वाग्लेले आफ्नो मत दिन पाउनु भएन । मतदाता नामावली तनहुँमा नभएकाले उहाँले पनि आफ्नो भोट दिन नपाउनु भएको हो । उहाँसँगै नेकपा एमालेका सर्वेन्द्र खनाल,नेपाल मजदुर किसान पार्टीबाट रामप्रसाद प्रजापति,नागरिक उन्मुक्ति पार्टीबाट भीमबहादुर सुनार,नेशनल मङ्गोल अर्गनाइजेसनबाट प्रेमबहादुर थापा, नेकपा समाजवादी पार्टीका गणेश श्रेष्ठ र राष्ट्रिय जनमुक्ति पार्टीका पूर्णबहादुर रानाले पनि आफ्ना लागि मतदान गर्न पाउनु भएन ।
नेपाली कांग्रेसका उम्मेदवार गोविन्द भट्टराई र राष्ट्रिय प्रजातन्त्र पार्टीका शोभा गुरुङले मात्रै आफ्ना लागि मतदान गर्नु भएको छ । तनहुँ १ मा ६९ मतदानस्थलमा १५२ मतदान केन्द्र रहेका छन् । ३ वटा अतिसंवेदनशील र २४ वटा संवेदनशील मतदानस्थल रहेका छन् । त्यहाँ मा १ लाख २३ हजार ३०५ मतदाताले मतदान गर्ने छन् । अहिले तोकिएका केन्द्रमा मतदान चलिरहेको छ ।
