काठमाडौँ । भोटेकोशी बाढीका क्रममा रसुवा र नुवाकोट जिल्लाबाट संकलित १ सय ६१ शव काठमाडौं आइपुगेको छ । तर, शव दावी गर्न आएकामध्ये २३ वटा शवमात्र पहिचान भई आफन्तले लगेका छन् ।
पहिचान हुन नसकेका शवहरुको ‘व्यवस्थापन संरक्षण’ गर्ने तयारी भइरहेको प्रहरीले जनाएको छ । त्यसका लागि पोष्टमार्टम र डीएनए स्याम्पल तयार पार्ने काम आइतबारदेखि नै थालिएको थियो । आज विहान १० बजेसम्ममा ५० वटा शव व्यवस्थापनका लागि तयार भएको छ । बाँकी शवहरु पनि दिनभरिमा पोष्टमार्टम गरी डीएनए स्याम्पल राखेपछि व्यवस्थापन गरिने छ।
काठमाडौँ ल्याइएका शवहरु त्रिवि शिक्षण अस्पताल, महाराजगञ्जमा राखिएका छन् । त्यहाँ शव दावी गर्न आउनेको घुइँचो छ । दावीकर्तालाई शव हेर्न दिने र आफन्तको हो भन्ने प्रमाणित भएपछि जिम्मा दिने काम पनि सँगसँगै भइरहेको पनि प्रहरीले जनाएको छ ।
यसअघि काठमाडौं ल्याइएका ८५ वटा शवलाई आईसीआरसी प्रोटोकलअनुसार व्यवस्थापन संरक्षण गरिएको थियो ।
