विराटनगर । १६औँ संस्करणको अन्तर्राष्ट्रिय आमन्त्रण इटहरी गोल्डकप फुटबल प्रतियोगितामा ललितपुरको सातदोबाटो यूथ क्लब सेमिफाइनलमा प्रवेश गरेको छ । बुधबार राति सम्पन्न तेस्रो क्वाटर फाइनल खेलमा आयोजक राष्ट्रिय जागृति क्लबलाई २–० गोल अन्तरले पराजित गर्दै सात दोबाटोले अन्तिम चारमा स्थान सुरक्षित गरेको हो ।
इटहरी रंगशालामा भएको खेलमा सातदोबाटोका सुरजज्यु ठकुरी र समीर तामाङले एक–एक गोल गर्दै टोलीलाई जित दिलाए । खेलको ३१औँ मिनेटमा सुरजले करिब ३० यार्ड टाढाबाट शक्तिशाली प्रहार गर्दै उत्कृष्ट गोल गरेका थिए। त्यसको चार मिनेटमै समीर तामाङले अर्को गोल थप्दै पहिलो हाफमै टोलीलाई २–० को स्पष्ट अग्रता दिलाए ।
पहिलो गोलमा उत्साहित सात दोबाटोले निरन्तर दबाब बनाइरहँदा आयोजक टोली भने सुरक्षात्मक खेलमा सीमित भयो। ३५औँ मिनेटमा राज भुसालको प्रहार गोल पोस्टमा लागेर फर्किएपछि समीर तामाङले रिबाउन्डलाई सदुपयोग गर्दै सहज रूपमा गोलमा परिणत गरेका थिए ।
दोस्रो हाफमा राष्ट्रिय जागृति क्लबले खेलमा फर्कने प्रयास गरे पनि सातदोबाटोको संगठित रक्षापंक्ति अगाडि उनीहरू सफल हुन सकेनन् । घरेलु मैदानमा खेलेको आयोजक टोली भने पहिलो खेलबाटै प्रतियोगिताबाट बाहिरिन बाध्य बन्यो ।
उत्कृष्ट प्रदर्शन गरेका समीर तामाङ ‘प्लेयर अफ द म्याच’ घोषित हुँदै नगद १० हजार रुपैयाँ प्राप्त गरे ।
अब सातदोबाटो यूथ क्लबले फाइनल प्रवेशका लागि अर्को सेमिफाइनल खेलमा प्लानिङ ब्वाइज युनाइटेड र युनाइटेड खरसाङ फुटबल क्लब (यूकेएफसी) बिचको विजेतासँग प्रतिस्पर्धा गर्नेछ । प्रतियोगिताको फाइनल खेल वैशाख ७ गते हुने तय भएको छ। विजेता टोलीले १० लाख र उपविजेताले ५ लाख रुपैयाँ पुरस्कार प्राप्त गर्नेछन् ।
