बाजुरा । बाजुरा जिल्ला स्तरीय प्रगति समीक्षा कार्यक्रम सम्पन्न भएको छ । बुधबार एक औंपचारीक कार्यक्रमका बिच बडी मालिका नगरपालिकाको सभा हलमा आयोजित उक्त वार्षिक प्रगति समीक्षा कार्यक्रम सम्पन्न भएको हो ।
सङ्घ र प्रदेश अन्तर्गतका सम्पूर्ण कार्यालयका कार्यालय प्रमुख, राजनीतिक दलका प्रमुख लगायतको उपस्थितमा उक्त कार्यक्रम सम्पन्न गरिएको हो । जिल्ला समन्वय समिति बाजुराका प्रमुख तुलसीराम रोकायाको अध्यक्षतामा सञ्चालन भएको कार्यक्रममा प्रमुख जिल्ला अधिकारी डोरेन्द्र निरौला,नेपाली कांग्रेस बाजुराका उपसभापति पदम बडुवाल,नेकपा एमाले जिल्ला कमिटी बाजुराका सचिव काँशी विक लगायतको उपस्थिति थियो ।
त्यस्तै विभिन्न पार्टीका प्रमुख एवम् प्रतिनिधि,विभिन्न सङ्घ तथा प्रदेश कार्यालयका कार्यालय प्रमुख,सुरक्षाकर्मी लगायत पत्रकारको उपस्थिति रहेको थियो ।जिल्ला स्थित सङ्घ तथा प्रदेश मातहतका कार्यालयहरूका कार्यालय प्रमुखहरूले गत आर्थिक वर्ष २०८१/८२ र ०८२/०८३ को हालसम्म कार्यालयले गरेका कार्यक्रमहरूको प्रगति विवरण प्रस्तुति गरेका थिए ।
कार्यक्रममा बोल्दै समन्वय प्रमुख तुलसीराम रोकायाले समन्वय समिति बाजुरा सबैमा समन्वयकारी भूमिका निर्वाह गरी अघि बढिरहेको बताएका थिए । कार्यालयले गरेका काम,कर्तव्य र प्रगतिलाई आगामी दिनहरूमा थप सुधार गर्दै लैजानुपर्नेमा जोड दिए । उनले प्रगति समीक्षा कार्यक्रम ढिलो भएकोमा क्षमा याचना समेत गरे ।
कार्यक्रममा कतिपय कार्यालय र राजनीतिक दलहरूका प्रमुख एवम् प्रतिनिधि उपस्थित नहुनुमा उनले दुस्ख व्यक्त समेत गरेका हुन् । अनुपस्थित कार्यालयहरूले जिम्मेवार बन्नुपर्ने बताउँदै आगामी दिनका कार्यक्रमहरूमा सबैको उपस्थित रहने विश्वास व्यक्त गरे । बाजुरा जिल्लाको समग्र विकाशको लागी सञ्चालन गरिएका साझा कार्यक्रममा सबैको अनिवार्य उपस्थिति हुनु नै महत्त्वपूर्ण उपलब्धि हुने जिकिर गरेका हुन् ।
त्यस्तै प्रमुख जिल्ला अधिकारी डोरेन्द्र निरौलाले समग्र बाजुरा जिल्लाको विकासमा दीर्घकालीन फाइदा हुने क्रियाकलाप सञ्चालन गर्न आवश्यक रहेको बताउँदै जिल्लास्थित सम्पूर्ण कार्यलयहरुले आपसी समन्वय,र सहकार्यका साथ अघि बढ्नुपर्नेमा जोड दिए ।
सबैको साथ सहयोग र समन्वयकारी भूमिकाले अगाडि बढेको खण्डमा मात्रै राम्रो उपलब्धि हुने हुँदा समन्वय र सहकार्यलाई आत्मसात् गर्न आवश्यक रहेको उनले बताएका हुन्। सम्पूर्ण कार्यालयहरूले समग्र जिल्लाको विकास,कार्यालयको मान,मर्यादा र गरिमा बढाउने गरी काम गर्नुपर्ने जिकिर गरेका हुन् ।
प्रगति समीक्षा कार्यक्रममा ३४ कार्यालयको उपस्थिति रहेको थियो । जसमा ३० सरकारी कार्यालय र ४ गैरसरकारी कार्यालय रहेको थिए।त्यस्तै ७ कार्यालय भने अनुपस्थित थिए।अनुपस्थित कार्यालयहरूमा जलस्रोत तथा सिचाइ सव डिभिजन,खानेपानी,घरेलु तथा साना उद्योग,सामाजिक विकास,कार्यालय,स्वास्थ्य बिमा बोर्ड,निर्वाचन कार्यालय र खेलकुद विकास समितिको कार्यालय रहेका छन् ।
लाखौका कार्यक्रमहरू सञ्चालन गर्ने तर कार्यक्रममा उपस्थिति नहुने कार्यालयहरूलाई समन्वयले उच्च निगरानीमा राख्ने जिल्ला समन्वय समिति बाजुरामा निमित्त समन्वय अधिकारी दीपेन्द्र पाण्डेले जानकारी दिए । समग्र बाजुराको विकासमा सही र सकारात्मक तरिकाले अघि बढ्न स्थानीय तहसँग समेत असल अभ्यास कार्यक्रम भइसकेको पाण्डेले जानकारी दिनु भएको छ । प्रगति समीक्षा कार्यक्रमको सञ्चालन रामचन्द्र पाण्डेले गरेका थिए ।
