काभ्रेपलाञ्चोक जिल्ला क्षेत्र नं. २ मा आगामी फागुन २१ गते हुने निर्वाचनका लागि राष्ट्रिय स्वतन्त्र पार्टी (रास्वपा) का संस्थापक नेता तथा काभ्रे जिल्ला सभापति प्रबिनकुमार ढकालले उम्मेदवारी घोषणा गरेका छन् । उनले नेकपा एमालेका प्रभावशाली नेता गोकुल बास्कोटाविरुद्ध प्रत्यक्ष चुनावी प्रतिस्पर्धामा उत्रिने घोषणा गर्दै एकल उम्मेदवारी दर्ता गराएका हुन् ।
रास्वपाका शशक्त योद्धाका रूपमा चिनिएका ढकाल पार्टी सभापतिमाथि भएको प्रतिशोधको विरोधमा आयोजित आन्दोलनका क्रममा गम्भीर रूपमा घाइते भएका थिए । उक्त आन्दोलनले देशभर राजनीतिक तरंग सिर्जना गरेको थियो । सो घटनापछि ढकाल पार्टीभित्र मात्र नभई आम नागरिकबीच पनि साहसी, प्रतिबद्ध र भरोसायोग्य नेताका रूपमा परिचित हुँदै आएका छन् ।
ढकाल रास्वपाका काभ्रे जिल्लाका संस्थापक नेता समेत हुन् । पार्टी स्थापना भएको सुरुवाती दिनदेखि नै सभापति र उपसभापतिको नजिक रहेर संगठन निर्माणमा सक्रिय भूमिका निर्वाह गर्दै आएका उनले गाउँ–गाउँमा रास्वपाको विचार, अभियान र एजेन्डा पुर्याउन उल्लेखनीय योगदान दिएका छन् । काभ्रे मात्र नभई देशभर संगठन विस्तार र सुदृढीकरणमा उनी निरन्तर सक्रिय रहँदै आएका छन् ।
सक्रिय राजनीतिमा आउनुअघि ढकाल २०७९ सालको स्थानीय तह निर्वाचनमा काठमाडौं महानगरपालिकाका मेयर बालेन्द्र शाह (बालेन) को चुनावी अभियानमा समेत संलग्न थिए । उनले बालेन शाहलाई विजयी गराउने अभियानमा सक्रिय भूमिका निर्वाह गरेको बताइन्छ, जसले उनको राजनीतिक सक्रियता र परिवर्तनमुखी धारणा झल्काउँछ ।
व्यवसायिक पृष्ठभूमिबाट राजनीतिमा प्रवेश गरेका ढकाल सफल व्यवसायी तथा कुशल व्यवस्थापकका रूपमा पनि परिचित छन् । उनले राजनीतिलाई पेशा होइन, सेवाको माध्यम ठान्ने स्पष्ट दृष्टिकोण राख्दै आएका छन् । स्पष्ट र खरो वक्ताका रूपमा चिनिने ढकाल भ्रष्टाचारविरुद्धको आवाज, सुशासन र जवाफदेहितालाई आफ्नो राजनीतिक यात्राको मुख्य आधार बनाउँदै आएका छन् ।
सामाजिक कार्यमा समेत सक्रिय ढकाल विभिन्न सामाजिक अभियान, सहयोग तथा जनसरोकारका गतिविधिमा निरन्तर संलग्न रहँदै आएका छन् । युवाहरू राजनीतिमा सक्रिय भएर देश परिवर्तनको अभियानमा जुट्नुपर्ने विश्वाससहित उनी राजनीतिमा होमिएको बताउँछन् । उनका अनुसार पुरानो सोच, अभ्यास र जडतालाई तोड्दै नयाँ संस्कार र इमान्दार नेतृत्व स्थापित गर्नु अहिलेको प्रमुख आवश्यकता हो ।
काभ्रेपलाञ्चोक क्षेत्र नं. २ मा गोकुल बास्कोटाविरुद्ध ढकालको उम्मेदवारीलाई रास्वपाले परिवर्तनको प्रतीकका रूपमा लिएको छ । पार्टीभित्र उनको उम्मेदवारीलाई लिएर उत्साह देखिएको छ भने स्थानीय तहमा पनि नयाँ राजनीतिक विकल्पप्रति चासो बढ्दै गएको देखिन्छ ।
उम्मेदवारी घोषणा गर्दै ढकालले काभ्रे–२ का जनतासँग प्रत्यक्ष संवाद गर्दै विकास, सुशासन र पारदर्शिताको स्पष्ट रोडम्याप प्रस्तुत गर्ने बताएका छन् । उनले नागरिकको भरोसा र समर्थनकै आधारमा निर्वाचन जित्ने विश्वास व्यक्त गरेका छन् । आगामी निर्वाचनमा ढकाल र बास्कोटाबीचको प्रत्यक्ष प्रतिस्पर्धालाई काभ्रेको राजनीतिक भविष्यसँग जोडेर हेरिएको छ ।
