मधेश प्रदेशका मुख्यमन्त्री सरोजकुमार यादवले पदबाट राजीनामा दिने तयारी गरेका छन् । सर्वोच्च अदालतको परमादेश बमोजिम २४ घन्टाभित्र विश्वासको पाउने आधार नदेखिएपछि उनले राजीनामा दिने तयारी गरेको मुख्यमन्त्रीनिकट स्रोतले जानकारी दियो ।
सर्वोच्चले सोमबार २४ घण्टाभित्र विश्वासको मत लिन परमादेश दिएको थियो । तर, आदेश आएको २४ घन्टाभित्र विश्वासको मत लिने कुरा अहिलेसम्म पनि तय भैसकेको छैन ।
सर्वोच्चको परमादेशपछि मुख्यमन्त्री यादव विश्वासको मत लिने कि राजीनामा दिने भन्ने विषयमा परामर्शमा रहेको उनीनिकट एक नेताले बताए । तर, मुख्यमन्त्री यादवले विश्वासको मत फेस गर्नुभन्दा राजीनामा दिने राजीनामा दिने उनले दाबी गरे । ‘विश्वासको मत लिन सफल नहुने अवस्था देखिएपछि उहाँले राजीनामा नै दिनुहुन्छ,’ मुख्यमन्त्री यादव निकट ती नेताले लोकान्तरसँग भने ।
प्रदेश सभा सचिवालयका सचिव वासुप्रसाद कोइराला मुख्यमन्त्रीले विश्वासको मत कहिले लिने भन्ने विषयमा पत्राचार गरेपछि मात्र सभाले सहजीकरण गरिदिने बताउँछन् । ‘सर्वोच्चको परमादेश आए पनि मुख्यमन्त्री कार्यालयबाट विश्वासको मत कहिले लिने भन्ने विषयमा पत्राचार नआएकाले अन्योल भएको हो,’ सचिव कोइरालाले लोकान्तरसँग भने ।
त्यसैगरी उपसभामुख बविता इशर राउतले पनि मुख्यमन्त्री कार्यालयबाट विश्वासको मत लिन कुनै पनि किसिमको पत्राचार नभएकाले केही गर्न नसकिएको बताइन् । ‘सर्वोच्च अदालतले गरेको परमादेश सहितको फैसला हिजो राति सोमबार साढे ८ बजे नै सर्वोच्च अदालत प्रशासनले प्रदेश सभा सचिवालयको इमेलमा पत्राचार गरिसकेको छ,’ उनले लोकान्तरसँग भनिन्, ‘तर, त्यसका लागि मुख्यमन्त्री कार्यालयबाट अहिलेसम्म कुनै पनि किसिमको खबर नआएकाले सदस्य कहिले बोलाउने भन्ने मिति तय हुनसकेको छैन ।’
तर, मुख्यमन्त्री यादवसँग भने यस विषयमा प्रतिक्रिया लिन खोज्दा सम्पर्क हुन सकेन ।
