काठमाडौँ । नेपाली कांग्रेसका नेता बालकृष्ण खाँणले नागरिकतासम्बन्धी विधेयक प्रमाणीकरण गर्न राष्ट्रपति रामचन्द्र पौडेललाई आग्रह गर्नु भएको छ । संघीय संसदको दुवै सदनले पास गरी दोस्रोपटक पठाएको नागरिकता विधेयकलाई प्रमाणीकरण गरेर राष्ट्रपति पौडेलले नागरिकताविहीनहरुलाई नागरिकता दिने कानुनी प्रबन्ध गर्नुपर्ने उहाँको भनाइ छ ।
आइतबार नेपाल प्रेस युनियन, धनुषाले जनकपुरमा आयोजना गरेको पत्रकार सम्मेलनमा नेता खाँणले नागरिकता विधेयक प्रमाणीकरणका लागि आवश्यक वातावरण बनाउन सरकार र राजनीतिक दलहरुको पनि ध्यानाकर्षण गराउनु भयो । संविधान अनुसार संघीय संसदका दुवै सदनले पास गरी दोस्रोपटक प्रमाणीकरणका लागि पठाइएको सो विधेयक तत्कालीन राष्ट्रपति विद्यादेवी भण्डारीले प्रमाणीकरण नगरेपछि राष्ट्रपति कार्यालयमै थन्किएर बसेको छ । सो विधेयक तत्काल प्रमाणीकरण गरी कानुनको अभावमा नागरिकता नपाएकाहरुलाई नागरिकता दिने कामको थालनी गर्नुपर्ने खाँणले बताउनु भयो ।
