काठमाडौँ । राष्ट्रिय स्वतन्त्र पार्टीका सभापति रवि लामिछानेमाथि राहदानी विवादमा मुद्दा नचलाउने महान्यायाधिवक्ताको निर्णयविरूद्ध परेको रिटमा अहिले सुनुवाइ भइरहेको छ । युवराज पौडेल (सफल) ले दिएको रिटको सुनुवाइ न्यायाधीश हरिप्रसाद फुयालको एकल इजलासमा सुरू भएको हो। सुनुवाइमा बहस गर्दै रिट निवेदकका वकिलले दुई वटा माग गर्नु भएको छ ।
वरिष्ठ अधिवक्ता सुरेन्द्र भण्डारीले लामिछानेले फेरि नागरिकता लिएको मिति माघ १५ गते आइतबार भएकाले उक्त दिन उहाँले अमेरिकी नागरिकता त्यागेको निस्सा प्रशासनमा बुझाएकोमा आफूलाई शंका रहेको बताउनु भयो । ‘शुक्रबार फैसला भयो, शनिबार विदा थियो। आइतबार उहाँले फेरि नागरिकता लिनुभयो। नागरिकता त्यागेको निस्सा अमेरिकी विदेश मन्त्रालयले दिनुपर्छ, त्यो डकुमेन्ट दूतावासले प्रमाणीकरण गर्नुपर्छ,’ भण्डारीले भन्नु भयो ,‘त्यो दिन अमेरिकी दूतावास विदा हुन्छ। उहाँले कसरी प्रमाणीकरण भएको निस्सा पेस गर्नुभयो?’
अदालतले जिल्ला प्रशासन कार्यालयबाट त्यो निस्सा मगाउन उहाँले माग गर्नु भएको छ । लामिछानेले अमेरिकाको राहदानी हुँदाहुँदै लिएको नेपाली राहदानी प्रयोग गरेर कुन-कुन मुलुक गए भन्ने विवरण पनि अध्यागमन विभागबाट मगाउन भण्डारीले माग गर्नु भएको छ । आजको सुनुवाइ रिट निवेदकका तर्फबाट भण्डारीसँगै अधिवक्ता राधिका खतिवडा, रमण कर्णलगायतले बहस गर्नु भएको छ । रविका तर्फबाट पनि दुई वकिलहरुले बहस गर्नु भएको छ ।
