काठमाडाैं । जनमत पार्टीका अध्यक्ष सीके राउतले आफूलाई सबै तिरबाट आक्रमण भइरहेको अभिव्यक्ति दिनु भएको छ। सामाजिक सञ्जालमा आफू अशक्त भएको पुरानो तस्वीर शेयर गर्दै राउतले आफू चारैतिरबाट घेराबन्दीमा रहेको लेख्नु भएको छ । उहाँले लेख्नु भएको छ, ‘विभिन्न पार्टीहरू, नेताहरू, सामाजिक संरचना, यथास्थितिवादीहरू, मिडिया, शक्ति केन्द्रहरू, साइबर सेलहरूको निरन्तर आक्रमणमा छु।’
सामाजिक सञ्जालमा राउतले आफू संगठन विस्तारमा व्यस्त हुँदा घरपरिवार लथालिंग भएको उल्लेख गर्नु भएको छ । उहाँले लेख्नु भएको छ, ‘ विगत १० वर्षदेखि लागेका लाखौं कार्यकर्ताहरूको भविष्य सुरक्षित गर्ने जिम्मेबारी पनि काँधमा छ। देश र समाजको जिम्मेबारी एकातिर, मनको आकर्षण सन्यास र अध्यात्ममा लीन हुने तिर भने पारिवारिक जिम्मेबारी अर्कोतिर लथालिङ्ग छ। घरमा बुवा डेन्टिस्ट कहाँ लगि दिन र वृद्ध आमा अपरेशनको प्रतीक्षामा छिन्, विरामी छोरी छट्पटाई रहँदा अस्पताल लैजाने कोही छैनन्, छोराको पढाई कहाँ पुग्यो थाहा छैन। म चाँहि निरन्तर बटुवा झैं संगठनको काममा कहिले यता त कहिले उता भौंतारिँदैछु।’
