काठमाडौं। सरकारका प्रवक्ता एवम् सञ्चार तथा सूचना प्रविधि मन्त्री पृथ्वीसुब्बा गुरूङले राजावादीहरूलाई उदारतापूर्वक संविधान, संघीय लोकतान्त्रिक गणतन्त्र उल्ट्याउन अभिव्यक्ति राख्न दिएको बताउँदै सधैं छुट दिन नसकिने बताएका छन् ।
बिहीबार मन्त्रिपरिषद् बैठकको निर्णय सुनाउन आयोजित नियमित पत्रकार सम्मेलनमा बोल्दै उनले राजावादीको गतिविधि सधैं उदारतापूर्वक टुलुटुलु हेरिरहन नसकिने र सरकारले प्रतिबन्ध पनि लगाउन सक्ने बताएका हुन्।
सरकार प्रवक्ता गुरूङले भने,‘हामीले उदारतापूर्वक संविधानको विरोध गर्नेहरूलाई पनि, अहिले स्थापित संघीय लोकतान्त्रिक गणतन्त्रको विरोध गर्नेहरूलाई पनि र यो शासन प्रणाली उल्ट्याउन चाहनेहरूलाई पनि सभा सम्मेलन गर्ने, बोल्ने अधिकार छाडिदिएको छ। त्यो हाम्रो कायरता, कमजोरी होइन, हामी डराएर पनि होइन। सधैं यस्तै भइराखे, सरकार सधैं चुप लाग्ने टुलुटुलु हेरिराख्ने भन्ने हुँदैन। गतिविधि कस्तो हुन्छ, त्यसको प्रतिक्रिया हुन्छ,अहिले हामीले प्रतिबन्ध लगाएका छैनौं, प्रतिबन्ध लगाउन पनि संविधानले छुट दिएको छ।
उनले संविधान विरोधी क्रियाकलापहरू भइराखेको बताए। हत्या,हिंसा,आगजनी,लुटपाटको माध्यमबाट सरकार,राज्यलाई चुनौती दिँदै राजा ल्याउने कुरा भइराखेको बताउँदै सरकार सधैँ मूकदर्शक बनेर हेर्न नसक्ने बताएका हुन्।
नवराज सुवेदी नेतृत्वको ‘संयुक्त जनआन्दोलन समिति’ ले जेठ १५ गतेदेखि ‘जनआन्दोलन’ घोषणा गरेको छ। उक्त कार्यक्रमलाई राप्रपा, राप्रपा नेपाललगायत दल तथा समूहहरूले साथ दिएका छन्।
