काठमाडौं। राजावादीहरुको संयुक्त जनआन्दोलन समितिले जेठ १५ देखि गर्ने राजधानी केन्द्रित आन्दोलनको तयारी तीव्र पार्दै लगेको छ । आन्दोलनमा बढीभन्दा बढी जनसहभागितालाई मध्यनजर गरिने उपत्यका जनजागरण अभियान संचालन गर्ने समेत निर्णय गरेको छ ।
राप्रपा केन्द्रीय कार्यालय धुम्बाराहीमा बसेको बैठकले काठमाडौं,ललितपुर र भक्तपुर केन्द्रित ५ दिने जनजागरण अभियान सुरु गर्ने भएको छ । काठमाडौंको साँखुबाट सुरु हुने अभियान काठमाडौंको काँठ क्षेत्र हुँदै ललितपुरबाट भक्तपुरको चाँगुनारायण पुगेर समापन गरिने भएको छ ।
स्रोतका अनुसार,‘कार्यक्रम तय गर्न एक कार्यदल बनाईएको थियो, कार्यदलले बिस्तृत कार्यक्रम बैठकमा पेश गरेको छ। कार्यक्रम प्रभाबकारी रुपमा कार्यान्वयन गर्न आज एक भेलासमेत आयोजना गरिएको छ ।
यसैगरी जनआन्दोलनको आबश्यकता, औचित्य र महत्त्वको बारेमा जेठ ६ गते विभिन्न क्षेत्रका प्रबुद्ध वर्गसँग अन्तरक्रिया कार्यक्रम तय गरि तयारी भैरहेको राप्रपा नेपालका महामन्त्री राजाराम बर्तौलाले जानकारी दिए ।
