काठमाडौं। प्रस्तुतिको लागि चर्चित बलिउड डान्सर तथा अभिनेत्री नोरा फतेही शनिबार काठमाडौंमा आएकी छन् । दुबईबाट नेपाल आएकी उनलाई त्रिभुवन अन्तर्राष्ट्रिय विमानस्थलमा आयोजकले स्वागत गरिएको छ ।
विमानस्थलको भीइआपी कक्षमा मिडियासँग कुराकानी गर्दै उनले पहिलोपटक नेपाल आउन पाउँदा खुसी लागेको बताएकी छिन् । आफ्ना गीतमा नेपाली प्रतिभाले आकर्षक भिडियो बनाएर मेन्सन र ह्यासट्याग गर्ने गरेको भन्दै नेपालीको प्रशंसा समेत गरिन् ।
आज बेलुका बौद्धमा आयोजना हुने ‘नोरा फतेही लाइभ इन नेपाल’ कार्यक्रममा आफूले हालैको बहुचर्चित गीत ‘स्नेक’मा प्रस्तुति दिन लागेको समेत उनले बताइन् । आफू यसअघि पनि नेपाल आउन लागेको तर, बल्ल जुरेको उनले बताइन् । शिक्षाबाट वञ्चित बालबालिकाको क्षेत्रमा काम गर्दै आएको सामाजिक संस्था ‘ह्युमन रेस्पेक्ट नेपाल’को सहयोगार्थ आयोजना हुने कार्यक्रमका लागि फतेही नेपाल आएकी हुन् । अहिले खल्ती र आइएमई पेबाट धमाधम टिकट विक्री भैरहेको आयोजक वल्र्डवाइड फिल्मस् नेटवर्क प्रालिका अध्यक्ष देव मगरले बताए ।
कार्यक्रममा नेपाली कलाकार दुर्गेश थापा, नृत्याङ्गना तेरिया फौजा मगर, नृत्यकार समर्पण लामा र ‘भ्वाइस अफ नेपाल सिजन ६’का उत्कृष्ट ५ मा पर्न सफल प्रोसेस पाण्डे, रोशन राई, अर्पणा आचार्य, प्रमेश राई, इन्द्रकला राईले प्रस्तुति दिनेछन् ।
