काठमाडौं। काठमाडौं जिल्ला अदालतले नेपाली कांग्रेसकी सांसद माया राईलाई १० लाख रुपैयाँ धरौटीमा रिहा गर्न आदेश दिएको छ । न्यायाधीश महेन्द्रबहादुर कार्कीको इजलासले कालीमाटीको स्वर्णलक्ष्मी बचत तथा ऋण सहकारीमा भएको ठगीसम्बन्धी प्रकरणमा सांसद राईलाई धरौटीमा रिहा गर्ने आदेश दिएको हो ।
राईलाई कालीमाटीस्थित स्वर्णलक्ष्मी सहकारीको करिब साढे २ करोड रुपैयाँ अपचलनसम्बन्धी आरोपमा पक्राउ गरिएको थियो । अनुसन्धानका क्रममा उनले सहकारी सञ्चालक समितिमा रहँदा बिनाधितो ऋण प्रवाह भएको र सूचीकृत नभएका संस्थामा लगानी गरिएको तथ्य खुलेको प्रहरी स्रोतले जनाएको छ ।
राई आर्थिक वर्ष २०७३/७४ मा सञ्चालक समिति सदस्य र २०७४/७५ तथा २०७५/७६ मा सहसचिवको जिम्मेवारीमा थिइन् । त्यही अवधिमा ८९ लाख ३४ हजार रुपैयाँभन्दा बढी रकम अपचलन भएको पाइएको छ । सहकारीका २० जना बचतकर्ताले सांसद राईसहितका व्यक्तिहरूविरुद्ध जाहेरी दिएका थिए ।
