काठमाडौं- राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्धको बन्दी प्रत्यक्षीकरण रिट आज पनि हेर्न नमिल्नेमा परेको छ।
लामिछानेको बन्दी प्रत्यक्षीकरण रिट तथा पूर्वडीआईजी छविलाल जोशीले सहकारी प्रकरणमा उजुरी दिने नारायणबहादुर पहराईसहित ४४ जनालाई विपक्षी बनाउँदै दायर गरेका अन्य दुई रिट आज न्यायाधीशद्वय नहकुल सुवेदी र अब्दुल अजिज मुसलमानको इजलासमा पेसी तोकिएकोमा लामिछानेका कानुन व्यवसायी वरिष्ठ अधिवक्ता नारायण कँडेलका अनुसार तीनै रिटमाथि आज हेर्न मिल्ने कि नमिल्ने भन्ने विषयमा सुनुवाइ भएको थियो ।
तर पूर्वडीआईजी जोशीको मुद्दा न्यायाधीश सुवेदीले पहिले नै हेरेकाले उनले मुद्दा हेरेनन् । जोशीको मुद्दा हेर्न नमिल्ने भएपछि एकै फाँटमा रहेका तीनवटै रिट हेर्न नमिल्नेमा पठाइएको छ ।
वैशाख ७ गते लामिछानेको तर्फबाट श्रीमती निकिता पौडेलले बन्दी प्रत्यक्षीकरणको रिट दायर गरेकी थिइन् । सोही दिन लामिछाने र जोशीको तर्फबाट सहकारी प्रकरणमा अन्य दुई रिट पनि दर्ता भएका थिए ।
