काठमाडौं। काठमाडौं महानगरपालिकाकी उपप्रमुख सुनिता डंगोलले वडा नम्बर २४ स्थित मखनटोलमा आगलागीबाट जलेका चारवटै घरको अनुगमन गरेकी छन् ।
बुधबार बिहान सुरूमा दयाराम श्रेष्ठको चारतले घरबाट आगलागी सुरू हुँदा अरू तीनवटा घरमा पनि क्षति भएको छ । क्षति भएका घरको अुनगमनसँगै उपप्रमुख डंगोलले घरमालिक दयाराम श्रेष्ठ, विनोदकुमार राजभण्डारीलगायतसँग कुराकानी गरेकी छन् ।
‘आगलागी भएको जानकारीसँगै मखनटोल पुगेर अनुगमन गरेकी छु,’ डंगोलले भनिन्, ‘अहिलेसम्म ग्यास लीक भएर आगलागी भएको भन्ने छ । आगलागीका घटना धेरैजसो ग्यास चुहिएर हुने गरेका छन् । तिनलाई पनि मध्यनजर गर्दै अनुमनलाई प्रभावकारी बनाउँछौँ ।’
डंगोलले महानगरपालिकाले नियमित अनुगमन गरिरहेको बताइन् । आगामी दिनमा ग्यास कम्पनी र डिलरमा पनि अनुगमन गर्ने जानकारी उनले दिइन् ।
आगलागीबाट श्रेष्ठको चारतले घर पूरै जलेको छ। त्यही घरमा एकजना महिलाको मृत्यु भएको छ । दयारामसँगैको रुकेश श्रेष्ठको पाँचतले, कैलाश श्रेष्ठ र विकास श्रेष्ठको घरमा पनि क्षति पुगेको वडाध्यक्ष विनोदकुमार राजभण्डारीले बताए ।
