धुलिखेल। नेकपा एमालेका नेता तथा पूर्व सञ्चार मन्त्री गोकुल बास्कोटाले काम गर्ने आँट भएकाहरुले नै गाली खाने र गाली खाएरै परिणाम देखाउने हिम्मत गर्नुपर्ने बताएका छन् ।
काभ्रेको बनेपामा आफ्नै पालामा जग्गा प्राप्तिको प्रक्रिया थालिएको अत्याधुनिक चलचित्र स्टुडियो शिलान्यास कार्यक्रममा सोही क्षेत्रका सांसद बास्कोटाले सराप खाएरै पनि परिणाम देखाउने बताए ।
बास्कोटाले भने-
सराप जति खाए पनि हुन्छ । काम सम्पन्न गर्ने हो, देखाउने हो । काम गर्नेले नै हो सराप खाने । सबैको चित्त बुझाउन सकिन्न, तर राम्रो काम गर्दा गाली खान तयार हुने हो । हाम्रो प्रधानमन्त्री पनि त्यस्तै हो । उहाँकै पालामा क्याबिनेटले निर्णय गरेर यो स्टुडियो निर्माणको काम थालेकाले आज उहाँले नै शिलान्यास गर्नुभयो, बजेट पनि छ । अब नपुग बजेट उहाँ नै यहाँ भएपछि व्यवस्था भइहाल्छ ।
सांसद बास्कोटाले बनेपामा अत्याधुनिक चलचित्र स्टुडियो निर्माणमा अभिभावकत्व लिएकोमा प्रधानमन्त्रीलाई काभ्रेली जनताको तर्फबाट धन्यवाद पनि दिए । उनले यसबीचमा स्टुडियोका लागि छुट्याइएको केही जग्गा हराएको भन्दै त्यसको खोजी गर्न चलचित्र विकास बोर्डको ध्यानाकर्षण समेत गराए ।
