काठमाडौं ।जनमत पार्टीबाट लुम्बिनी प्रदेशसभा सदस्य रहेकी गीता गुरुङले जनताले तिरेको करबाट तलब खान उपयुक्त नभएको भन्दै राजीनामा पठाइन् । तर,उनको पदत्यागको कारण भने अर्कै रहेको खुलेको छ ।
सीके राउत नेतृत्वको जनमत पार्टीबाट भैरहवाकी गुरुङ समानुपातिक सांसद भएकी थिइन् । सांसद भएको तीन वर्षपछि अचानक उनको राजीनामा आयो, त्यो पनि जनताको पीरमर्का आफूले बुझेको सन्देशसहित । राजीनामापत्रमा गुरुङले लेखेकी छिन्, ‘देश र जनताको पीरमर्का मैले राम्ररी बुझेको छु । राष्ट्र र जनताभन्दा माथि केही हुँदैन भन्ने मान्यतासहित जनताले तिरेको करबाट तलब खान उपयुक्त नलागेकाले राजीनामा दिएको छु ।’
तर, उनले जनताको पीरले भन्दा बेलायत बस्न थालेकाले राजीनामा दिएको खुलेको छ । जनमत पार्टीका संसदीय दलका नेता चन्द्रकेश गुप्ताका अनुसार, गुरुङ दुई महिनादेखि पार्टीको सम्पर्कमा थिइनन् । उनी बेलायत नै बस्न थालेपछि प्रदेशसभामा जनमत पार्टीको प्रतिनिधित्त्व हुन सकेको थिएन ।
पार्टीबाट निरन्तर गुनासो आउन थालेपछि अन्ततः उनले बेलायतबाटै हस्तलिखित राजीनामा पठाएकी हुन् । राजीनामा पत्र उनका पति कैलाश गुरुङले सार्वजनिक गरेका हुन् । सांसद गुरुङको राजीनामा आधिकारिक रूपमा प्रदेशसभामा पुगेर स्वीकृत भएपछि जनमतले उनको सट्टामा नयाँ सांसद पठाउने नेता गुप्ताले बताए ।
