काठमाडौं – सत्तारूढ नेकपा एमालेका प्रमुख सचेतक महेश बर्तौलाले प्रमुख प्रतिपक्षी दल नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले संसदमा दिएको अभिव्यक्तिप्रति आपत्ति जनाएका छन्।
आइतबार प्रतिनिधिसभाको बैठकमा राष्ट्रपति समक्ष प्रस्तुत नीति तथा कार्यक्रममाथिको छलफलमा भाग लिँदै बर्तौलाले पूर्वप्रधानमन्त्री प्रचण्डको टिप्पणी ‘पूर्वाग्रहयुक्त र असंसदीय’ भएको टिप्पणी गरे।
“प्रमुख प्रतिपक्षी दलका नेताबाट नीति तथा कार्यक्रममाथि भन्दा पनि सरकारप्रति पूर्वाग्रही ढंगले अभिव्यक्ति दिइयो,” बर्तौलाले भने, “सरकार दलाल र बिचौलियाले बनाएको हो भन्ने कुरा उहाँले पटक–पटक दोहोर्याउँदै आउनुभएको छ, जुन स्वीकार्य छैन।”
बर्तौलाले स्पष्ट पारे– वर्तमान सरकार संसद्ले संविधानअनुसार गठन गरेको हो, कुनै ‘बिचौलियाको चलखेल’बाट बनेको होइन। “यो सरकार संसद्ले बनाएको हो, संविधान बमोजिम बनाएको हो। त्यसैले बारम्बार सरकारलाई अपमानजनक विशेषण लगाउनु संसदीय मर्यादाविपरीत हो,” उनले बताए।
पूर्वप्रधानमन्त्रीबाट पटक–पटक यस्तो असंसदीय भाषा प्रयोग हुनु खेदजनक रहेको बर्तौलाको भनाइ छ। “दलाल, माफिया, बिचौलिया भन्नु गम्भीर आरोप हो। यो संसद्को सम्मानको विषय हो,” उनले थपे, “यस्ता कुण्ठाग्रस्त अभिव्यक्तिले संसदीय मर्यादालाई च्युत गर्छ। म यसप्रति आपत्ति जनाउँछु र उहाँको ध्यानाकर्षण गराउन चाहन्छु।”
बर्तौलाको भनाइले सरकारको वैधता र संविधानिक प्रक्रियाप्रति उठाइएका राजनीतिक भाष्यको जवाफमा सत्तापक्षको स्पष्ट दृष्टिकोण झल्किएको छ।
