काठमाडौँ । भारतीय सरकारले सामाजिक सञ्जाल कम्पनी एक्स (पहिलेको ट्वीटर) लाई ८,००० भन्दा बढी अकाउन्टहरू भारतमा रोक्न कार्यकारी आदेश जारी गरेपछि एक्स भारतसँग असन्तुष्ट बनेको छ।
भारतीय सरकारले अकाउन्टमा प्रतिबन्ध लगाउन अनुरोध गरेपनि अधिकांश अकाउन्टहरूको कुन सामग्रीले भारतको कुन कानून उल्लंघन गरेको हो भन्नेबारे स्पष्ट प्रमाण वा विवरण भने दिइएको छैन ।
“हामी भारत सरकारका मागहरूसँग सहमत छैनौं। सबै अकाउन्टहरू रोक्नु अनावश्यक निर्णय हो, यसले अभिव्यक्ति स्वतन्त्रताको हनन गर्छ। यो वर्तमान र भविष्यको सामग्रीको सेन्सरसिप हो,” एक्सले आफ्नो पोस्टमा उल्लेख गरेको छ ।
यो निर्णय कम्पनीका लागि पनि सहज नभएको तर निर्देशन गरिए अनुरूप अकाउन्टहरू बन्द गर्न आफू बाध्य भएको पनि कम्पनीले उल्लेख गरेको छ । यद्यपि, कम्पनीले कानुनी विकल्पहरूको खोजी गरिरहेको जानकारी दिएको छ ।
एक्सले भारतस्थित प्रयोगकर्ताहरूलाई कानुनी सहायता लिन आग्रह गरेको छ र प्रभावित प्रयोगकर्ताहरूलाई सूचना पनि दिइसकेको जनाएको छ।
