विराटनगर। जबर्जस्ती करणीको अभियोगमा पक्राउ परेका बिर्तामोड नगरपालिकाका पूर्वमेयर तथा नेकपा एमालेका नेता ध्रुवकुमार शिवाकोटीलाई उच्च अदालतले धरौटीमा रिहा गर्न आदेश दिएको छ। उच्च अदालत विराटनगरको इलाम इजलासले बिहीबार उनलाई २० लाख रुपैयाँ धरौटीमा रिहा गर्ने आदेश दिएको हो।
शिवाकोटीले घरमा काम गर्न राखेकी १५ वर्षीया नाबालिगमाथि करणी गरेको अभियोगमा मंसिरमा प्रहरीले पक्राउ गरेको थियो। पीडित किशोरीलाई भारततर्फ लैजाँदै गर्दा ‘आफन्त नेपाल’ नामक संस्थाले उद्धार गरेको थियो। त्यसपछि किशोरीकी हजुरआमाले झापा जिल्ला अदालतमा किटानी जाहेरी दिएकी थिइन्।
झापा जिल्ला अदालतले पुस २२ गते उनलाई पुर्पक्षका लागि थुनामा पठाउने आदेश दिएको थियो। तर, शिवाकोटी अस्वस्थता जनाउँदै झापा स्थित बीएण्डसी अस्पतालमा भर्ना भई थुनामा नबसी अस्पतालमै बस्दै आएका थिए।
उक्त आदेशविरुद्ध उच्च अदालतमा पुनरावेदन दायर गरेका शिवाकोटीको मुद्दा पटक–पटक स्थगित हुँदै बिहीबार मात्र सुनुवाइ सम्पन्न भएको हो। उच्च अदालतका न्यायाधीशद्वय किरणकुमार पोखरेल र रेखा थापा पाण्डेको संयुक्त इजलासले उनलाई धरौटीमा रिहा गर्न आदेश दिएको हो।
अदालतको आदेशमा उल्लेख छ, “प्रतिवादीले पीडितलाई आफ्नो घरमा वर्षैदेखि पालनपोषण गरी विद्यालयमा अध्ययन गराई आएकोमा विगत ३ वर्षदेखि जबर्जस्ती करणी गर्दै आएको भन्ने आरोप किटानी जाहेरीमा भए पनि, पीडित र उनकी हजुरआमाबीच पटक–पटक फोन तथा प्रत्यक्ष भेटघाट भएको उल्लेख मौकाको कागजमा पाइन्छ। तर पीडितले उक्त कुरा हजुरआमालाई भनेको प्रमाण छैन।”
पीडित किशोरीले विद्यालय पोशाकमै भारततर्फ जाँदै गर्दा ‘आफन्त नेपाल’ संस्थाका प्रतिनिधिसँग आफूमाथि भएको बलात्कारको पीडा पोखेको थिइन्। उद्धारपछि उनको परिवारसँग सम्पर्क गरी किटानी जाहेरी दर्ता गरिएको हो।
पूर्वमेयर शिवाकोटी एमालेबाट निर्वाचित भएका थिए। अहिले उनमाथि लागेका अभियोगबारे अनुसन्धान जारी रहेको बताइएको छ। यद्यपि अदालतको आदेशले उनलाई अस्थायी रूपमा छुट दिए पनि कानुनी प्रक्रिया भने अझै टुंगोमा पुगेको छैन।
