काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रमाथि आपराधिक उपद्रवको कसुरमा अर्को मुद्दा थपिएको छ । गत चैत १५ गते तीनकुनेमा भएको झडपपछि पक्राउ परेका मिश्रमाथि यसअघि राज्यविरुद्धको कसुर र संगठित अपराध अन्तर्गत मुद्दा दायर गरिएको थियो । बिहीबार फेरि आपराधिक उपद्रवको मुद्दा पनि थपिएको हो ।
जिल्ला अदालत काठमाडौंमा म्याद थपका लागि उपस्थित गराइएका मिश्रले न्यायाधीशसमक्ष आपत्ति जनाउँदै भने, “४१ दिनसम्म दुई वटा मुद्दाको टिका बोकेर हिँडेको थिएँ, आज फेरि तेस्रो टिका – आपराधिक उपद्रव – लगाइयो ।”
उनले राज्यले निरन्तर आफूलाई लक्षित गरेर मुद्दा थोपरेको गुनासो गर्दै न्यायालयसँग न्यायको अपेक्षा राखेका छन् । “त्यो टिका पुछ्ने अधिकार, निष्ठा यो न्यायालय र बेञ्चमा हुन्छ,” मिश्रले भनेका छन् ।
मिश्रलाई हालसम्म सातपटक म्याद थपेर प्रहरी हिरासतमा राखिएको छ ।
