काठमाडौं। पाकिस्तानसँगको सिमा तनाव चुलिँदै जाँदा भारतीय सेनाका एक जवानको मृत्यु भएको छ। पाकिस्तानको सेनाले गरेको आक्रमणमा परी भारतीय फाइभ फील्ड रेजिमेन्टमा कार्यरत लेसनायक दिनेश कुमार मारिएका हुन्।
भारतीय सेनाको ह्वाइट नाइट कोर युनिटले सामाजिक सञ्जाल एक्स (पूर्व ट्विटर) मार्फत कुमारको मृत्युबारे पुष्टि गर्दै भनेको छ, “५ फील्ड रेजिमेन्टका लान्स नायक दिनेश कुमारले मे ७ मा पाकिस्तानी सेनाको गोलाबारीको क्रममा आफ्नो प्राण आहुति दिए।”
यसअघि मे ६ मा भारतको जम्मु–कश्मीरस्थित पहलगाम क्षेत्रमा भएको एक आतंकवादी आक्रमणमा परेर एक नेपाली नागरिकसहित २६ जनाको ज्यान गएको थियो। सो घटनाको जवाफस्वरूप भारतले मे ७ को रातिदेखि पाकिस्तानका विभिन्न स्थानमा हवाई हमला सुरु गरेको हो।
भारतीय पक्षले पाकिस्तान नियन्त्रित कश्मीरमा ५ र पाकिस्तानकै मुख्य भूभागमा ४ गरी कुल ९ स्थानमा एयर स्ट्राइक गरेको जनाएको छ। तीमध्ये बहावलपुरस्थित जैश ए मोहम्मदको आधार शिविरमा गरिएको हवाई आक्रमणमा संगठनका एक जना कमाण्डर मसुद अजहरका परिवारका १० सदस्यको मृत्यु भएको बताइएको छ। यो तथ्यलाई जैश ए मोहम्मदले समेत पुष्टि गरेको छ।
पाकिस्तानले भने भारतको हवाई आक्रमणबाट ३१ जनाको मृत्यु र ५७ जना घाइते भएको दाबी गरेको छ। भारतले सो अपरेसनलाई ‘अपरेसन सिन्दूर’ नाम दिएको छ। यो अपरेसनपछि दुबै देशबीच सिमा क्षेत्रमा व्यापक गोलीबारी भएको छ।
सीमा क्षेत्रमा दुबैतर्फबाट भइरहेको अन्धाधुन्ध गोलीबारीका कारण सयौं सर्वसाधारण नागरिक बंकरमा शरण लिन बाध्य भएका छन् भने धेरैजसोले सुरक्षित स्थानतर्फ सरेका छन्। गोलीबारीका कारण घर, सवारीसाधन, धार्मिक स्थल तथा अन्य भौतिक संरचनाहरूमा भारी क्षति पुगेको बताइएको छ।
सन् २०२१ को फेब्रुअरी २५ मा भारत र पाकिस्तानबीच भएको संघर्षविराम सम्झौतापछि यति ठूलो र प्रत्यक्ष भिडन्त यो नै पहिलो भएको हो।
