काठमाडौं। नेकपा एमालेले कोशी प्रदेशका पूर्वमन्त्री र पार्टीका ताप्लेजुङ पूर्व जिल्ला अध्यक्ष बलबहादुर साम्सोहाङ र युवा नेता मणि पोमुलाई कारबाही गरेको छ। विराटनगरमा भएको प्रदेश कमिटी बैठकले दुवै नेतालाई जिम्मेवारीबाट हटाउने निर्णय गरेको हो।

Advertisement

उनीहरूलाई युवा संघको जिल्ला अधिवेशनमा भएको हातपात र तोडफोडको घटनामा संलग्न रहेको आरोप छ। गत वैशाख १८ मा ताप्लेजुङमा सम्पन्न अधिवेशनमा नेतृत्व चयनपछि पोमुको नेतृत्वमा आक्रमण भएको र केही घाइते समेत भएको जानकारी प्राप्त भएको छ।

पोमुको नेतृत्वमा २० जनाको समूहले बन्दसत्रको हलमा छिरेर आक्रमण गरेको आरोप छ। यस घटनामा पोमु प्रत्यक्ष संलग्न रहेको र साम्सोहाङले निर्देशन दिएको आरोप छ। प्रदेश कमिटीले छानबीन समिति गठन गरी थप निर्णय लिने तयारी गरिरहेको छ।