काठमाडौं । प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबिच करिब २ घण्टा छलफल भएको छ । प्रधानमन्त्रीको कार्यालय सिंहदरबारमा हिजो सोमबार बेलुका भएको छलफलमा सङ्क्रमणकालीन न्यायसम्बन्धी दुई आयोग गठनको प्रक्रिया र सरकार सञ्चालनलगायतका समसामयिक विषयमा छलफल भएको जनाइएको छ ।
छलफलमा गृहमन्त्री रमेश लेखक र प्रधानमन्त्रीका मानवअधिकार तथा सङ्क्रमणकालीन न्यायसम्बन्धी सल्लाहकार अग्नि खरेल पनि सहभागी रहेका थिए । बैठकपछि गृह मन्त्री रमेश लेखकले टीआरसी लगायत समसामयिक विषयमा दुई नेताबिच छलफल भएको जानकारी गराएका हुन् । मन्त्री लेखकका अनुसार दुई नेताबिचको भेटमा टीआरसीको प्रोसेस र आयोगले गरिरहेको कामबारे सामान्य कुराकानी भएको छ ।
भेटमा गठबन्धन र सरकारबारे बाहिर आएका हल्लाहरूका विषयमा छलफल भएको हो । ‘नेपाली कांग्रेसका केही नेताहरूले सार्वजनिक रुपमा असन्तुष्टि राखिरहे पनि सत्ता सहयात्रामा संकट छैन भन्ने कुरा प्रधानमन्त्रीले बैठकमा राख्नुभएको थियो,’ एमालेका एक पदाधिकारी भन्छन्, ‘सत्ता समीकरण सुरक्षित छ भन्दा प्रधानमन्त्री जसरी प्रस्तुत हुनुभयो, त्यसले सत्ता संकट टरेको अनुमान लगाउन सकिन्थ्यो ।’ एमालेका ती पदाधिकारीको विश्लेषणलाई बल पुग्नेगरी अरू राजनीतिक घटनाक्रम पनि विकसित भइरहेको देखिन्छ । वर्तमान सत्ताको संकट टरेकै अनुमानलाई बल पुग्ने बलियो उदाहरण त नेकपा माओवादी केन्द्रको अध्यक्ष पुष्पकमल दाहाल प्रचण्डको सार्वजनिक अभिव्यक्ति नै हो ।
सोमबार प्रतिनिधि सभा बैठकबाट बाहिरिँदै प्रचण्डले सत्ता बनाउनेतिर आफ्नो ध्यान नरहेको सार्वजनिक प्रतिक्रिया दिएका छन् । ‘अहिले हाम्रो ध्यान सरकार बनाउनेतिर छैन । हाम्रो ध्यान जनतामै जाने छ,’ प्रचण्डले भनेका छन्, ‘मध्य पहाडी लोकमार्ग अभियानमा जाँदैछौं । जादु चलाउन चाहे चल्छ, तर अहिले हामी चलाउने पक्षमा छैनौं ।’
यसअघि प्रधानमन्त्री ओलीले टीआरसीबारे आइतबार प्रमुख प्रतिपक्षी नेकपा माओवादीका अध्यक्ष पुष्पकमल दाहाल ‘प्रचण्ड’सँग छलफल गरेका थिए ।
सङ्क्रमणकालीन न्यायसम्बन्धी दुई आयोग सत्य निरूपण तथा मेलमिलाप र बेपत्ता पारिएका व्यक्तिको छानबिन आयोगमा पदाधिकारी नियुक्ति गर्ने तयारी छ । त्यसका लागि सिफारिस कमिटीले सर्ट लिस्ट सार्वजनिक गरे पनि पदाधिकारीको नाम सिफारिस गरेको छैन ।
