काठमाडौं । नेकपा एमालेका सांसद सूर्यबहादुर थापा क्षेत्रीले सत्ता साझेदारबीच संयन्त्रको अभ्यासमा समस्या भए खारेज गर्न सुझाव दिएका छन् ।
सोमबार प्रतिनिधिसभाको विशेष समयमा बोल्दै थापाले लोकप्रियताका लागि सत्ता साझेदार दलका नेताहरूले नै सरकारविरुद्ध वक्तव्यवाजी गरेको देखिएको बताए । अस्थिरतालाई मलजल हुने काम सत्ता साझेदारभित्र रहेका कसैले पनि गर्न नहुने उनको भनाइ छ । ‘अहिले सत्ता गठबन्धनको विमत्तिमा कुनै काम भएको छैन सरकार एमालेकरण भयो भन्नु गलत छ’, उनले भने ।
त्यस्तै थापाले गठबन्धनको अभ्यासमा सबै अधिकार एकदललाई मात्रै नहुने भन्दै ऊर्जामन्त्रीको प्रस्तावमा कुलमानलाई हटाएको विषय प्रधानमन्त्रीसँग जोडेकोमा आपत्ति जनाए । गठबन्धन सरकारको अभ्यास र कार्यतरिका हेक्का राख्न सत्तारुढ दलकै सांसदहरूलाई उनको आग्रह छ ।
सरकार ढल्ने वक्तव्यबाजीले मिडिया रंगिने र समाजमा ध्वनि प्रदूषण हुने क्रम जारी रहेपनि त्यस्ता वक्तव्य निरर्थक सावित भएको थापाको जिकिर छ । थापाले लुटपाट र आगजनीबाट व्यवस्था नबदलिने भन्दै निन्द्राबाट व्युँझिएर यथार्थलाई आत्मसाथ गरेर अघि बढ्न सुझाव दिए ।
