काठमाडौं – यसपालिको दसैंमा काठमाडौंबाट देशभरका विभिन्न गन्तव्यमा जाने यात्रुहरूका लागि लामो दूरीका बसको अग्रिम टिकट बुकिङ असोज १२ गते (शनिबार)बाट खुला गरिने भएको छ । यातायात व्यवस्था विभागमा मंगलबार यातायात व्यवसायीको उपस्थितिमा भएको बैठकले दसैंका लागि अग्रिम टिकट बुकिङ खुला गर्ने निर्णय गरेको हो ।
सो बैठकमा यातायात व्यवस्था विभागले आगामी असोज १० गतेबाटै टिकट बुकिङ खुलाउन प्रस्ताव गरेको थियो । तर, बैठकमा सहभागी यातायात व्यवसायीले तयारीको समय केही कम हुने सुझावसहितको धारणा राखेपछि दुवै पक्षबीच भएको सो छलफलमा आगामी असोज १२ गतेदेखि अग्रिम टिकट बुकिङ सुरु गर्ने सहमति जुटेको हो ।
सरकार र सम्बन्धित यातायात व्यवसायी प्रतिनिधिहरूबीच सम्पन्न भएको बैठकले सम्भव भएसम्म यातायात व्यवसायीले अनलाइनमार्फत बुकिङको व्यवस्था मिलाउने निर्णय गरेको छ । आगामी असोज १७ गते घटस्थापनाको दिनबाट सुरु हुने दसैंका लागि अध्ययन, विभिन्न पेसा, व्यवसाय एवं काम विशेषले काठमाडौं उपत्यकामा बस्दै आएका लाखौं यात्रु सडकमार्ग हुँदै आ–आफ्नो गन्तव्यमा जाँदै छन् ।
यातायात आवागमन सहज बनाउन घटस्थापनादेखि आगामी कात्तिक १ गते पूर्णिमासम्म नारायणघाटदेखि काठमाडौंसम्म खाद्यान्नलगायत अत्यावश्यक वस्तु ढुवानी गर्ने बाहेकका ठूला सवारीसाधन सञ्चालनमा रोक लगाउने निर्णयसमेत सो बैठकले गरेको विभागले जनाएको छ ।
सोही बैठकमा घटस्थापनादेखि पूर्णिमासम्म यात्रुबाहक सवारीसाधनलाई देशभर रुट परमिट खुला गर्ने निर्णय पनि भएको विभागले जानकारी दिएको छ । सम्बन्धित यातायात व्यवसायी, गोंगबुको नयाँ बसपार्कस्थित लोत्से बहुउद्देश्य प्रालि, नाडाका प्रतिनिधि, सिप्रदीसमेतका प्रतिनिधि र सरकारका प्रतिनिधिबीच सम्पन्न भएको सो बैठकमा ट्राफिक प्रहरीको पनि उपस्थिति थियो । विभागले घटस्थापनादेखि पूर्णिमासम्म नेपालभर रुट परमिट खुला गरिने बताएको छ । याे समाचार राजधानी दैनिकमा छ ।
