काठमाडौं – गत मंसिरमा एमालेले गरेको समृद्धिका लागि संकल्प यात्रामा आफ्नो स्वामित्व रहेको प्रधानमन्त्रीले बताएका छन्।
आज बसेको प्रतिनिधि सभाको बैठकमा नेकपा एमालेका सांसद कृष्णगोपाल श्रेष्ठले राखेको प्रश्न जवाफमा प्रचण्डले आफ्नो पनि स्वामित्व रहेको कुरा बताएका हुन् । प्रधानमन्त्री प्रचण्डले एमालेले गरेको मध्यपहाडी लोकमार्गको यात्रा आफू पहिलो पटक प्रधानमन्त्री हुँदा रेखांकन गरेको स्मरण गर्दै भनेका थिए।
एमाले सांसद कृष्णगोपाल श्रेष्ठले संकल्प यात्रापश्चात आफूहरूले बुझाएको ७७२ बुँदे सुझावको कार्यान्वयन कसरी भइरहेको छ भनेर प्रश्न गरेका थिए । जवाफमा प्रधानमन्त्री प्रचण्डले आफू यो विषयमा गहन भएको पनि बताएका हुन ।
“प्रतिवेदन बुझ्दै मैले मेरो पनि केही न केही स्वामित्व छ भनेको थिए । यातायात सन्जाललाई जोडेर आर्थिक सामाजिक सांस्कृतिक सन्तुलित विकास गर्ने मध्यपहाडी लोकमार्ग निर्माण गर्नुपर्छ भनेर मेरो पहिलो कार्यकालमा रेखांकन प्रस्ताव पारित गरिएको थियो । त्यहाँ नेकपा (एमाले) नेतृत्वको यात्रा कही न कही म छु भन्ने हो,” उनले भने ।
