१५ असोज, काठमाडौं । नेपाली कांग्रेसका केन्द्रीय सदस्य राधेश्याम पाठकको परिवारका ११ जना क्षेत्रीय प्रतिनिधिमा चयन भएका छन्।
नेपाली कांग्रेसको १५औँ महाधिवेशनअन्तर्गत नवलपरासी (पश्चिम)को रामग्राम नगरपालिका–९ बाट असोज ५ गते सर्वसम्मत चयन भएका २४ क्षेत्रीय प्रतिनिधिमध्ये पाठक परिवारका ११ जना रहेका छन्।
क्षेत्रीय प्रतिनिधिको सूचीमा केन्द्रीय सदस्य राधेश्याम पाठकसहित चन्द्रशेखर पाठक, आशुतोष पाठक, कालिन्दी पाठक, गीता पाठक, जयदेव पाठक, तुषार पाठक, दामोदर पाठक, वेदव्यास पाठक, भोला पाठक र विश्वभरप्रसाद पाठक रहेका छन्।
केन्द्रीय सदस्य पाठकले आफ्नो परिवारका ११ जना क्षेत्रीय प्रतिनिधिमा चयन भएको स्वीकार गरेका छन्। उनी विशेष महाधिवेशनबाट मधेसी क्लस्टरअन्तर्गत कांग्रेसको केन्द्रीय सदस्य बनेका थिए।
पाठकले भने वडा अधिवेशनबाट आफूहरूको परिवारका सदस्यलाई कार्यकर्ताले नै प्रतिनिधि चयन गरेको दाबी गरेका छन्। उनका अनुसार रामग्राम–९ मा पाठक परिवारका करिब दुई सय परिवार छन्।
‘एउटै परिवारको होइन, त्यहाँ हाम्रो दुई सय परिवार छन्। कार्यकर्ताले प्रतिनिधि बनाएका हुन्,’ पाठकले भने।
उनले केही नेताका परिवारमा तीन जना सदस्य भए तीनै जना प्रतिनिधि बन्न सक्ने तर आफ्नो वडामा ठूलो परिवारबाट धेरै प्रतिनिधि चयन हुँदा प्रश्न उठाउन नहुने तर्क गरे।
‘जसको घरमा तीन जनामात्रै छन्, उनीहरू तीनै जना प्रतिनिधि बन्न मिल्ने, त्यो राम्रो भयो ? जसको घरमा दुई सय जना छन्, उसले १० जना बनाउँदा नराम्रो भयो ?’ पाठकले प्रश्न गरे।
उनका अनुसार वडा नम्बर ९ अन्तर्गत चार गाउँमा पाठक समुदायका करिब दुई सय परिवार रहेका छन्।
