काठमाडौं । नेकपा (एमाले) का प्रमुख सचेतक ऐन महरले पूर्वप्रधानन्यायाधीश चोलेन्द्रशमशेर जबरालाई मध्यरातमा ‘गुण्डागर्दी’ शैलीमा पक्राउ गरिएको टिप्पणी गरेका छन्।
सोमबार बसेको प्रतिनिधिसभा बैठकमा बोल्दै महरले जबरा पक्राउ प्रकरणलाई ‘राज्य आतंकको बर्बर नमुना’को संज्ञा दिए। उनले जबरालाई बिनाकसुर र बिनाअभियोग पक्राउ गरिएको दाबी गर्दै लोकतन्त्रमा कोही पनि कानुनभन्दा माथि हुन नसक्ने बताए।
महरले सरकारको विरोध गरेकै आधारमा व्यक्तिहरूमाथि धरपकड र दुःख दिने काम भइरहेको आरोप लगाए। उनले पूर्वप्रधानमन्त्री केपी शर्मा ओली र एमाले उपाध्यक्ष विष्णु पौडेललाई समेत सरकारले दुःख दिएको दाबी गरे।
पूर्वप्रधानन्यायाधीश जबरालाई धम्की दिने व्यक्तिमाथि कारबाही नगरी उनलाई नै पक्राउ गरिएको भन्दै महरले आपत्ति जनाए। उनले जबरालाई धम्की दिने ‘जेनजी’ समूहका व्यक्तिलाई सार्वजनिक गर्न सरकारसँग मागसमेत गरे।
