काठमाडौँ । पूर्वाधार विकास मन्त्री सुनिल लम्सालले प्रतिनिधिसभाको बैठकमा ‘फोहोरमैला व्यवस्थापन विधेयक, २०८३’ प्रस्तुत गरेका छन्।
बैठकमा विधेयक पेस गर्न अनुमति माग्ने प्रस्ताव स्वीकृत भएपछि मन्त्री लम्सालले विधेयक प्रस्तुत गरेका हुन्।
विधेयक प्रस्तुत गर्दै मन्त्री लम्सालले फोहोरमैलाको वैज्ञानिक व्यवस्थापन, स्रोतको परिचालन र स्वच्छ वातावरण निर्माणका लागि विधेयक महत्त्वपूर्ण हुने बताए। उनले फोहोरमैलाको उत्सर्जन, सङ्कलन, विसर्जन तथा समग्र व्यवस्थापनमा संघ, प्रदेश र स्थानीय तहको भूमिका र जिम्मेवारी स्पष्ट गर्न विधेयक आवश्यक रहेको उल्लेख गरे।
उनले फोहोरलाई केवल फोहोरका रूपमा नभई स्रोत र साधनका रूपमा उपयोग गर्नुपर्नेमा जोड दिए। त्यसका लागि तीनै तहका सरकारबीच प्रभावकारी समन्वय र सहकार्य आवश्यक रहेको उनको भनाइ थियो।
मन्त्री लम्सालका अनुसार विधेयकको मुख्य उद्देश्य फोहोरमैलाको समुचित व्यवस्थापनमार्फत स्वच्छ र स्वस्थ वातावरण कायम गर्नु हो। मानव स्वास्थ्य तथा वातावरणमा पर्न सक्ने प्रतिकूल प्रभाव न्यूनीकरण गर्दै चक्रीय अर्थतन्त्रको अवधारणाअनुसार फोहोर प्रशोधन गरी स्रोतसाधनका रूपमा उपयोग गर्ने व्यवस्था विधेयकले अघि सारेको उनले बताए।
फोहोरमैला व्यवस्थापनलाई दिगो र व्यवस्थित बनाउन संघीय कानुन आवश्यक रहेकाले विधेयक संसदमा प्रस्तुत गरिएको मन्त्री लम्सालले जानकारी दिए। उनले विधेयकले विद्यमान कानुनी तथा प्रशासनिक जटिलता हटाउँदै फोहोरमैला व्यवस्थापनलाई थप प्रभावकारी बनाउने विश्वास व्यक्त गरे।
