काठमाडौं । सामान्य प्रशासन तथा भूमिसुधार मन्त्री प्रतिभा रावलले देशभरको सुकुम्बासी समस्या ५०० दिनभित्र समाधान गरी भूमिहीन सुकुम्बासी, दलित र अव्यवस्थित बसोबासीलाई कानुनी प्रक्रियामार्फत लालपुर्जा उपलब्ध गराउने घोषणा गरेकी छन्।
कञ्चनपुरमा स्थानीय सुकुम्बासीलाई सम्बोधन गर्दै मन्त्री रावलले कसैलाई पनि बिना विकल्प नउठाइने भन्दै डोजरको त्रास नपाल्न आग्रह गरिन्। नकारात्मक सूचीमा परेका जग्गाको समस्या पनि आवश्यक नीति तथा कानुनी परिवर्तनमार्फत समाधान खोजिने उनले बताइन्।
रावलले काम नगरी नेता तथा मन्त्रीलाई अबिर र खादा लगाएर सम्मान नगर्न आग्रह गर्दै आफूले समस्या समाधान गरेपछि मात्रै सम्मान स्वीकार गर्ने बताइन्। सुकुम्बासीको समस्या सरकारको प्राथमिकतामा रहेको र यसलाई चुनावी मुद्दा बन्न नदिने उनको भनाइ छ।
उनले सरकार गठन भएदेखि नै देशभरको भूमिहीन समस्या समाधानका लागि काम भइरहेको बताउँदै केही समय धैर्य गर्न आग्रह गरिन्।
