काठमाडौं । एमाले अध्यक्ष केपी शर्मा ओली कोशी प्रदेशका मुख्यमन्त्री हिक्मतकुमार कार्कीलाई निरन्तरता दिने सहमतिबाट पछि हटेका छन्। यसअघि उपाध्यक्ष विष्णु पौडेल र महासचिव शंकर पोखरेलसँगको छलफलमा कार्कीलाई यथावत् राख्ने सहमति भएको थियो।
स्रोतका अनुसार ओलीले पार्टी सचिव तथा कोशी इन्चार्ज शेरधन राईलाई विराटनगर पठाएर कार्कीलाई राजीनामा दिन आग्रह गराएका छन्। तर कार्कीले आफू संविधानको धारा १६८(५) अन्तर्गत मुख्यमन्त्री बनेकाले राजीनामा दिए संवैधानिक जटिलता आउन सक्ने भन्दै अस्वीकार गरेका छन्। उनले यसबारे पार्टी सचिवालयले निर्णय गर्नुपर्ने धारणा पनि राखेका छन्।
एमाले पुनर्गठन अभियानमा कार्की सक्रिय भएपछि उनलाई हटाउने निष्कर्षमा ओली पुगेको स्रोतको दाबी छ। यसअघि कर्णालीका मुख्यमन्त्री यामलाल कँडेल हटिसकेका छन् भने अब कोशीमा पनि नेतृत्व परिवर्तनको तयारी भइरहेको बताइएको छ।
उच्च स्रोतका अनुसार कार्कीले राजीनामा नदिए प्रदेश सांसदहरूको बहुमत जुटाएर नेतृत्व परिवर्तन गर्ने रणनीतिमा ओली स्वयं सक्रिय भएका छन्।
